«…Лето 6494(986). Избираша Владимирь веры, кая лучши, избра же веру хрестияньскую.
Лето 6494. Иде Владимирь на Корсунь, градь греческий, с вой. И затворишася корсунене во граде. Изнемогаху корсуняне у граде гладомь. И рече имь Владимирь: «Аще се не удастеся, стоять имамь зде за 3 лета». И сим не покорившимся. Повеле Владимирь приспу сыпати ко граду.
И ни подписавше стену градскую, крадяху перьсть и ношаху собе у град, сыпающе посреде града.
И се муж корсунянин, именемь Анастас, стрели, написавь стреле: «Кладязи, яже суть за тобою на устоце, ис того вода идеть трубами у город». Володимир узревь на небо, рече: «Аще се збудется, то самь крещуся». И повеле копати упреки и переяша воду. Изнемогоша люди жаждею водою у градѣ и предашася. И вниде у град и дружина его. И посла Владимирь ко царемь Василью и Костяньтину, реку: «Се [град] ваю силныи взях, слышю, яко сестру имата девою и аще ее не удаста за мя, сотворю граду вашему, яко же и сему». И се слышавше царие, послали к Володимиру, глаголаще: «Яко недостойно християномь за поганыя давати, аще се крестиши, то и се получиши и царьство небесное примеши, а с нами единоверен будеши, аще ли сего не сотвориши, не можемо дати [се]стры своей за тебе». И рече Володимирь к посломь: «Хощу аз креститися, испытахь бо преже сихь дний законь ваш». И се слышавше царие ради быша, и умолиста сестру свою Анну, и посласта ю к Володимерю, и сановники некии, прозвутеры. И яко приидѣ Корсуню, изыидоша корсуняне и с полкомь, и уведоша у град, и посадиша ю во полате. По божию же строению в то время разболеся Володимира очима, и не виде ничто же, и тужиша велми, и не домышляшеся, что створити. И посла к нему царица, рекучи: «Аще хощеши избыти болезни сея, то воскорѣ крестися, аще ли [ни], то не имаши исцелити». Се слышавь, Володимир рече: «Да аще се истинна будеть, то поистиннѣ велик богь християньский». И повеле крестити себе. Епископь же руский с попы царициными крести его, яко же узложи на него руку, и абие прозри. Видевь же се Володимирь напрасное исцеление и прослави бога, рек: «То первое увидех, прослави бога истиннаго». Се же видевши дружина его, мнози крестишася у церкви. По крещении же приведе царицю на брачное. Неции убо не ведуще глаголють, яко крестися у Киевѣ инии же реша у Василеве, но не бысть тако.
Владимир же пойма царицю Анну и Онастаса, и попы корсуньскыя, и мощи святого Климента, и сосуды церковныя, иконы на благословение собе, взя же 4 иконы медяны. Дал же за вено грекомь град Корсунь, а сам приидѣ к Киеву. Повелѣ кумиры избити, а иных огневи предати, и посла по всему городу, рекучи: «Яко аще кто заутра не обрящеться на рецѣ или богат или нищь, противен ми будеть». И се слышавше людие с радостию идяху креститися…».
Смотри:
АКАДЕМИЯ НАУК СССР; ИНСТИТУТ ИСТОРИИ СССР; ПОЛНОЕ СОБРАНИЕ РУССКИХ ЛЕТОПИСЕЙ; ТОМ ТРИДЦАТЬ ПЯТЫЙ ЛЕТОПИСИ БЕЛОРУССКО-ЛИТОВСКИЕ; ИЗДАТЕЛЬСТВО «НАУКА»; МОСКВА 1980. СЛУЦКАЯ ЛЕТОПИСЬ (стр. 81).
http://adverbum.org/s-psrl35.htm
Странно?
Как можно не зная истории??
Заниматься пустословием???