У Кіеве з’явілася вуліца Уладзіміра Караткевіча.
Прапанову змяніць назву вуліцы Дабралюбава на Караткевіча ўнёс украінскі пісьменнік Вячаслаў Лівіцкі: «Ушанаванне гэтага таленавітага пісьменніка важнае як для дыялогу Украіны з дэмакратычна настроенай беларускай грамадскасцю, так і для актуалізацыі недаацэненых фактаў у культуры Кіева. Караткевіч – выпускнік Кіеўскага ўніверсітэту, любіў сталіцу Украіны і пісаў пра яе ясней за многіх іншых урбаністаў. Акрамя таго, гаворка ідзе пра вуліцу ў раёне, дзе разгортваюцца трагічныя падзеі кіеўскай аповесці Караткевіча «Лісце каштана». Ідзе гаворка пра чалавека, чыя філасофія (свабода, годнасць, жыццялюбства, уменне сябраваць і ўпартасць у апраўданай нянавісці як вышэйшыя цноты) выразна пазначыла каштоўнасці ўсіх беларусаў, якія зараз абараняюць Украіну».
Таксама ў Кіеве ёсць помнік Уладзіміру Караткевічу. Ён знаходзіцца каля беларускай амбасады.
Усяго ў Кіеве перайменавалі 16 гарадскіх аб'ектаў, назвы якіх звязвалі з РФ.
|
|
