Шуҳратжон АҲМАДЖОНОВ

2024: ФУҚАРОЛИГИМГА ДОИР НАВБАТДАГИ ШИКОЯТ АРИЗАМ

2024 йил июл-август ойи бироз тиқилинч келди. Шундай бўлсада, Фуқаролигимга доир навбатдаги шикоят аризамни 2024 йил 30 август куни тугатдим. 1 сентябр куни тушдан кейин Вашингтондаги элчихонамиз олдида 40 дақиқа пикет қилдим. Элчихона ичкарисида кимдир бор эди. Байрам куни бўлгани сабабли ҳеч ким олдимга чиқмади. Олдинги шикоятларимга жавоб келмагани сабабли бу галги шикоят аризамни элчихона дарвозасига илинган қутига ташламадим.

Қуйидаги суратда пикетда фойдаланган плакатимнинг икки томонига ёзилган ўзбек ва инглиз тилларидаги илтимосим бор.

МЕНИ ЎЗБЕКИСТОН ФУҚАРОЛИГИДАН НОҚОНУНИЙ
МАҲРУМ ҚИЛИШДИ.
ФУҚАРОЛИГИМНИ ТИКЛАШИНГИЗНИ
ИЛТИМОС ҚИЛАМАН.
---------------------------------------------------------------
I WAS ILLEGALLY DEPRIVATED CITIZENSHIP
OF UZBEKISTAN.

PLEASE RESTORE MY CITIZENSHIP

---------------------------------------------------------------

Ўзбекистон Президенти Шавкат Мирзиёевга
нусхаси Ўзбекистоннинг АҚШдаги элчиси Фурқат Сиддиқовга
нусхаси Ўзбекистон «Ватандошлар» жамоат фондининг Васийлик кенгаши раисига
нусхаси “Озодлик” радиосининг Ўзбек муҳарририяти директори Алишер Сиддиққа
нусхаси “Би-би-си” радиосининг Марказий Осиё муҳарририяти директори Ҳамид Исмоиловга
нусхаси “Америка овози” радиосининг Ўзбек муҳарририяти раҳбари Жавдат Сайхонга

Ўзбекистон фуқароси Шуҳратжон Аҳмаджоновдан (ўзбек, 1954 йилда туғилганман)
Манзилим:
216 Tulip Dr.,
Gaithersburg, Maryland, 20877
E-mail: maqsadsh54@gmail.com

2024 йил 30 август – 1 сентябр

2024: ФУҚАРОЛИГИМГА ДОИР ШИКОЯТ АРИЗАМ (ОЧИҚ ХАТ)

Аваламбор Сизни 2024 йил 1 сентябр куни нишонланаётган Ўзбекистон Мустақиллигининг 33 йиллиги билан самимий табриклайман.

Ўзбекистон фуқаролигидан маҳрум қилиш ҳақидаги расмий хатни 2021 йил 21 октябр куни Ўзбекистоннинг АҚШдаги консули-биринчи котиби Фахриддин Мўминов менга берди (фото 1).

Шикоятдан мақсадим: Ҳурматли Шавкат Миромонович! Илтимос, ушбу адолатсиз қарорни бекор қилинишига ва Ўзбекистон фуқаролигини сақлаганлигимни тасдиқланишига ёрдам берсангиз.


Фото 1. Ўзбекистон фуқаролигидан маҳрум қилинганимга доир инглиз тилидаги расмий хат. Уни менга Ўзбекистоннинг АҚШдаги консули-биринчи котиби Фахриддин Мўминов 2021 йил 21 октябр куни берди.

Ҳужжатдаги матнни ўзбек тилига мен ўгирдим.

“2021 йил 21 октябр

ТАЛАБ ҚИЛИНГАН ЖОЙДА КЎРСАТИШ УЧУН

Ўзбекистон Ресубликасининг Америка Қўшма Штатларидаги элчихонаси Консуллик бўлими қуйидагини тасдиқлайди: Ўзбекистон Ресубликаси Президентининг 2015 йил 22 майдаги PF-4727 рақамли Фармони билан Шуҳратжон Аҳмаджонов (1954 йил 20 январда туғилган) Ўзбекистон фуқаролигидан маҳрум қилинди.

Агар сизда бунга доир қандайдир саволлар бўлса, сиз 202-887-5300 телефони орқали элчихона билан ёки + 1202-251-8298 мобил телефони орқали шахсан мен билан боғланишингиз мумкин (uzbekconsul.org@gmail.com или consul.washington@mfa.uz ).

Фахриддин Мўминов,
Ўзбекистоннинг АҚШдаги консули-биринчи котиби (имзо ва муҳр)”

Мен Ўзбекистон Республикаси фуқароси эканлигим ва АҚШда 2010 йил январдан бери яшаётган бўлсамда Ўзбекистон фуқаролигини сақлаганимга доир маэлумотларни Сиз 2020 йил 13 март куни имзолаган “Ўзбекистон Республикасининг фуқаролиги тўғрисида” номли қонун моддалари асосида таҳлил қилай (www.lex.uz/acts/4761984 March 13, 2020).

Қонуннинг 4-моддасида бундай ёзилган.

“2005 йил 1 январга қадар Ўзбекистон Республикасида доимий яшаш жойи бўйича рўйхатга олинган ҳамда муқаддам чет давлат фуқаролигида бўлмаган шахс хоҳиш билдирган тақдирда, Ўзбекистон Республикасининг фуқароси деб тан олинади” (www.lex.uz/acts/4761984 March 13, 2020)

Паспортимга доир маълумот. Мен 1999 йил 2 декабрда олган Ўзбекистон паспортида суратим ёпиштирилган ва асосий маълумотлар ёзилган саҳифаси нусхасини 2-фотода келтирдим. 45 ёшда олинган паспорт шу инсоннинг умри охиригача берилар эди. Паспортим рақами: CG 0491414. Ушбу паспортим рўйхатга қўйилган (прописка қилинган) манзил: Жиззах вилояти, Шароф Рашидов (собиқ Жиззах) тумани, Қулама қишлоқ фуқаролар йиғини, Тинчлик кўчаси, 25-уй.


Фото 2. Мен 1999 йил 2 декабрда олган Ўзбекистон паспортида суратим ёпиштирилган ва асосий маълумотлар ёзилган саҳифаси нусхаси.

Демак, қонуннинг 4-моддасига асосан Ўзбекистонда 1954 йил январда туғилганимдан бери Ўзбекистон Республикаси фуқароси бўлганман ва ҳамон фуқаросиман.

Ушбу фото ва кейинги муҳим сурат ҳамда ҳужжатлар Сизга 2023 йил 7 декабр куни жўнатган йигирма бетлик “Фуқаролигимга доир шикоят” номли шикоятимда келтирилган. Ўша шикоятни ушбу шикоятимга илова қилдим.

Ўзимга доир маълумот. Ўзбекистонда инсон ҳуқуқларини ҳимоя қилганим ва мустақил журналист сифатида ёзган юзлаб танқидий мақолаларим учун 2007-2008 йилларда менга қарши тазйиқлар жуда кучайди ва туҳмат билан қамалиш хавфи пайдо бўлди. Шу сабабли 2008 йил октябрида Ўзбекистонни тарк этишга мажбур бўлдим. АҚШ ҳукумати менга сиёсий бошпана беришга рози бўлди ва мен АҚШга 2010 йил 21 январ куни келдим.

Мен АҚШда яшаётганимга 14 йилдан кўпроқ вақт ўтган бўлсада, мен АҚШ фуқаролигини қабул қилмадим ва Ўзбекистон фуқаролигида қолдим.

Қонуннинг 9-моддасида қуйидагича ёзилган.

“Ўзбекистон Республикаси фуқаросининг хорижда яшаши Ўзбекистон Республикаси фуқаролигининг тугатилишига сабаб бўлмайди” (www.lex.uz/acts/4761984 March 13, 2020)

Демак, мен 2008 йил октябрда Ўзбектистонни тарк этишга мажбур бўлиб, хорижга кетганлигим, ва 2010 йил январдан бери АҚШда сиёсий муҳожир сифатида яшаётганим Ўзбекистон Республикаси фуқаролигимнинг тугатилишига сабаб бўлолмайди.

Ўзбекистон Республикасининг фуқаролигини йўқотиш асослари ҳақида қонуннинг 25-моддасида қуйидагича ёзилган.

“25-модда. Ўзбекистон Республикасининг фуқаролигини йўқотиш асослари
Ўзбекистон Республикасининг фуқаролиги қуйидаги ҳолларда йўқотилади:
а) шахс чет давлатнинг ҳарбий хизматига, хавфсизлик органларига, ҳуқуқни муҳофаза қилувчи органларига, давлат ҳокимияти ва бошқаруви органларига хизматга кирганлиги оқибатида;
б) агар хорижда доимий яшовчи шахс етти йил мобайнида узрли сабабларсиз доимий консуллик ҳисобига турмаган бўлса;
в) агар Ўзбекистон Республикаси фуқаролигига қабул қилиш била туриб ёлғон маълумотлар ёки сохта ҳужжатларни тақдим этиш натижасида амалга оширилган бўлса;
г) агар шахс чет давлатнинг фойдасини кўзлаб фаолият кўрсатган ҳолда ёки тинчлик ва хавфсизликка қарши жиноятлар содир этиш йўли билан жамият ҳамда давлат манфаатларига жиддий зарар етказган бўлса;
д) агар шахс ихтиёрий равишда чет давлатнинг фуқаролигини олган бўлса;
е) агар шахс чет давлатнинг фуқаролигини туғилганлик бўйича ёхуд чет давлат фуқароси бўлган отасининг ёки онасининг фуқаролиги асосида, вояга етмаган ёшида олган бўлса ва йигирма бир ёшга тўлгунига қадар чет давлат фуқаролигидан чиқишни расмийлаштирмаган бўлса.» (www.lex.uz/acts/4761984 March 13, 2020)

Мен 25-моддада ёзилган а), в), г), д) ва е) бандларини бузмаганлигим аниқ. Агар бирорта амалдор ушбу қонун бандларидан бирортасини бузганлигимда айбласа, марҳамат қилиб исботласин.

25-модданинг б)-бандига доир айбловни алоҳида таҳлил қилай.

Мен 2010 йил январда АҚШга келгач, Ўзбекистоннинг АҚШдаги консуллик ваколатхонаси ходимларига доимий консуллик ҳисобига киритишни илтимос қилишим учун Ўзбекистоннинг АҚШдаги элчихонасига келишим талаб қилинарди. Мен 1988 йил ноябрдан Ўзбекистон Бирлик халқ ҳаракати Тошкентшаҳар ташкилоти раисининг биринчи ўринбосари лавозимида ўзбек тилининг давлат тили сифатида қонунан белгиланиши ва Ўзбекистон Мустақиллиги учун фаол қатнашганлигим сабабли Совет Иттифоқининг Давлат хавфсизлиги қўмитасининг қора рўйхатига киритилгандим.

Мен 1991-1993 йилларда мухолиф Эрк демократик партияси Тошкент шаҳар ташкилотининг иккинчи котиби бўлиб, демократия учун ва ватандошларим инсон ҳуқуқларини ҳимоя қилиш учун фаолият олиб бордим. Мен мустақил журналист ва инсон ҳуқуқлари ҳимоячиси сифатида юзлаб танқидий мақолалар ёзиб сайтларда чоп қилдим. Мана шу фаолиятим учун Ўзбекистон Миллий хавфсизлик хизмати ва прокуратураси ўзининг қора рўйхатига киритди. Менга қарши тазйиқлар кучая боравергач ва туҳмат билан қамалиб кетиш хавфи пайдо бўлгач мен 2008 йил октябрида Ўзбекистонни тарк этишга мажбур бўлдим.

Ўзбекистоннинг Вашингтондаги элчихонасига келиб, доимий консуллик ҳисобига турмаганлигим сабабларидан бири ҳақида муҳим факт. Бахтиёр Ғуломов (1964) Ўзбекистоннинг АҚШдаги элчиси сифатида 2013 йил июл ойида тайинланди. Унинг туғишган укаси генерал-лейтенант Шуҳрат Ғулямов (1966) Ўзбекистон Миллий хавфсизлик хизмати раисининг биринчи ўринбосари эди. Айнан 2013 йил августдан АҚШда менинг нарсаларимни ўғирлаш ва босқинчилик билан талаш авжига чиқди.

2014 йил 26 майга ўтар кечаси икки босқинчи тўппончасини пешонамга тираб сумкам ва рюкзагимни олиб кетишди. Сумкамда Ўзбекистон паспортим ҳам бор эди. Мен полицияга телефон қилдим ва улар воқеага доир рапорт ёзди (1- ва 2-иловага қаранг).

Биринчидан, агар МХХ генерал-лейтенанти Шуҳрат Ғуломов ўз акаси Бахтиёр Ғуломовдан АҚШга юборилган МХХ ходимларига ёрдам беришни сўраса рад қилмаслиги аниқ эди. Иккинчидан, Шуҳрат Ғуломов ўғри ва талончиларнинг хизматлари учун ҳақ тўлаш, шунингдек, менинг ўғирланган ва босқинчилик билан талаб олинган ноутбукларим, кундаликларим, флешкаларим, телефонларим, рекордер, фотоаппаратлар ва бошқа журналист жиҳозларим ни сотиб олиш учун катта миқдорда хориж валютасини тақдим қилишга етарлича имкониятлари бор эди. Менимча, Тошкентдан Вашингтонга юборилган МХХ зобитлари, шунингдек, АҚШда яшовчи зобитлари менинг нарсаларимни олиш учун пул мукофотлари билан буюртма беришган, айрим ҳолларда ўғирлик ва босқинчиликларда ўзлари ҳам қатнашган.

Мана шу шароитда мен доимий консуллик ҳисобига турмоқчи бўлиб Ўзбекистоннинг Вашингтондаги элчихонасига келсам, мени тутиб, қўлимга кишан солишлари ва Бахтиёр Ғуломов укаси генерал-лейтенанти Шуҳрат Ғуломовга хабар бериши мумкин бўларди. Шуҳрат Ғуломов: “Шуҳрат Аҳмаджонов кўп йиллардан бери ғашимизга тегиб кўп ишлар қилди, танқидий мақолалар ёзавериб жонимизга тегди. Уни Ўзбекистонга жўнатинг” деса йўқ дермиди.

Таққослаш учун: Саудиялик журналист, қочқин Жамол Хашогги (1958-2018) 2018 йил 2 октябр куни Саудия Арабистонинг Истамбулдаги консуллик идорасига ҳужжатларни олиш учун келди. У ичкарига киргач, уни ҳибсга олиб, қаттиқ қийнашди. Уни ўлдириб танасини нимта-нимта қилиб кесишди. Саудия Арабистони судининг 2019 йил 23 декабрдаги ҳукми билан бу жиноятларда қатнашган беш киши ўлим жазосига, яна уч киши жами 24 йилга қамалди. Жамол Хашоггининг жасади бўлаклари шу кунгача топилган эмас. Хашогги Джамаль, биография и творчество писателя — РУВИКИ (ruwiki.ru)

Собиқ МХХ генерал-лейтенанти Шуҳрат Ғуломов 2017 йил январда ҳибсга олинди. Ўзбекистон Республикаси Олий ҳарбий суди (Трибунали)нинг 2017 йил 10 августдаги ҳукми билан қилган жиноятлари ва Ўзбекистонга 1,5 миллиард (!) доллар зарар етказгани учун умрбод қамоқ жазосига ҳукм қилинди. Шундан кейингина 2017 йил апрел ойида Бахтиёр Ғуломов элчилик лавозимидан олинди ва янги элчи тайинланди.

Мен инсон ҳуқуқлари ҳимоячиси сифатида 2012 йилдан 2024 йилгача Ўзбекистоннинг вашингтондаги элчихонаси олдида йилига бир-икки марта пикет ўтказдим. Масалан, 2016 йил 4 декабр кунги пикет ҳақида. Маълумки, Президент Ислом Каримов (1938-2016) 2016 йил 2 сентябр куни вафот қилди. 2016 йил 4 декабр куни Ўзбекистоннинг янги Президентини сайлови ташкил қилинди. Мен сайловни байкот қилиш билан чекланмадим. Шу куни Вашингтондаги элчихона олдида 3,5 соатлик пикет ўтказдим. Пикет вақтида Ўзбекистон қамоқхоналаридаги 42 нафар сиёсий маҳбус озод қилинишини сўрадим. 42 нафар маҳбуснинг ўзбек ва рус тиллардаги рўйхатини ўнг тарафдаги плакатимга илова қилганман (3-фотога қаранг). Ушбу рўйхатнинг ўзбек ва рус тилларидаги нусхаларини элчихона дарвозасига илинган почта қутисига ташладим.


Фото 3. Мен пикетдаман. Вашингтон шаҳри. 2016 йил 4 декабр. Муаллиф фотоси.

Таъкидлашим керакки, 2017 йил давомида барча 42 нафар сиёсий маҳбус қамоқхоналардан озод қилинди ва улар ўз оилалари бағрига қайтишди. Шундан кейин менда Сиз – Шавкат Миромонович раҳбарлигида Ўзбекистонда ижобий томонга ўзгаришлар бошланганига ишонч пайдо бўлди.

2018 йил баҳорида Вашингтондаги элчихонамизда учрашув бўлди. АҚШда яшаётган Ўзбекистон фуқаролари ўз муаммоларига доир саволлар бериб жавоб олишди. Мен ҳам ўша учрашувда қатнашиб паспортимни қуролли босқинчилар олиб кетишганини айтиб, янги паспортни қандай олишим мумкинлигини сўрадим (фото 4).


Фото 4. Паспортимни қуролли босқинчилар олиб кетишганини айтиб, янги биометрик паспортни қандай олишим мумкинлигини сўраётган пайтим. Ўзбекистоннинг Вашингтондаги элчихонаси. 2018 йил баҳори. Журналист Навбаҳор Имамова фотоси.

Ўзбекистоннинг янги биометрик паспортини олишимга ҳалақит берган воқеалар ҳақида қисқача ёзай.

АҚШда яшаётган ўзбек қочқинларидан олти нафарига қарши заҳарлаш, суиқасд, босқинчилик, ўғирлик ва тазйиқ уюштиришаётгани, ҳибсга олиб кўп йиллар давомида суд қилиша олмаётганига доир аниқ фактлар асосида шикоят ёздим ва 2015 йил февралда АҚШ Президенти Барак Обамага жўнатдим Хатимнинг инглиз тилидаги матнини 3-иловада, ўзбек тилидаги матнини 4-иловада келтирдим.

Масалан, Колорадо штати Денвер шаҳрида яшаган ўзбек қочқини жиззахлик ҳамшаҳрим Жамшид Мухторовни (1976) АҚШ Федерал қидирув бюроси агентлари “хориждаги террорчиларга моддий ёрдам берган” деган туҳмат билан 2012 йил 21 январ куни ҳибсга олиб 2015 йилгача суд қилиша олмади. Унинг уч нафар фарзанди бўлиб, оиласи билан ижарадаги хонадонда яшарди. Президент Барак Обамага ёзган хатимдан кейин унинг устидан дастлабки суд 2015 йил августга белгиланди. У суд ҳам, 2017 йил мартда бошланган суд ҳам қолдирилди. Мен Жамшидга Вашингтонга АҚШ Олий судига шикоят ёзишни маслаҳат бердим. АҚШ Конституциясининг Олтинчи Тузатишида ҳибсга олинган фуқаро тез ва қонун талаблари доирасида суд қилиниши, суд қилинмаган тақдирда (масалан бир йил давомида) маҳбуснинг шикояти асосида у дарҳол озод қилиниши ҳақида ёзилган. У ёзмади. 2018 йил июнда бошланган судда у хориждаги террорчиларга ақалли бир долларлик ёрдам берганига доир айбномани Федерал қидирув бюроси агентлари ва прокурорлар исботлаша олмади. Шундай бўлсада уни 11 йилга қамаш ҳақида суд ҳукми ўқилди. Жамшид Мухторов 2022 йил 7 январ куни АҚШдан Ўзбекистонга қайтарилди.
(AQSh terrorizmda aybdor deb topilgan o'zbekistonlikni vatanga qaytardi. - www.amerikaovozi.com/a/6393781.html (www.amerikaovozi.com/a/ January 12, 2022).

Мен Денвер шаҳридаги суд жараёнларидан кейин Вашингтон шаҳрига 2018 йил ёзда қайтиб келдим. 2018 йил сентябр тунларидан бирида менинг грин-картам ва ижтимоий таъминот карточкамни ўғирлаш уюштиришди (фото 5). Бундай ўғирликни АҚШ Федерал қидирув бюроси (ФҚБ) агентлари ва улар билан боғлиқ шахслар тунда ухлаётганимда наркоукол қилиш ҳамда наркосўроқ ўтказиш давомида уюштирган, деб ҳисоблайман. ФҚБ агентлари наркоукол қилиш ва наркосўроқ ўтказиш услубини менга қарши 2010-2024 йиллар давомида кўп марта қўллашди.


Фото 5. Менинг грин-картам (Green card) ва ижтимоий таъминот карточкам (Social Securite) сурати.

Мен биометрик паспорт олишга доир талабларни Ўзбекистоннинг АҚШдаги элчихонаси сайтининг рус тилидаги саҳифасида ўқидим:
Биометрический паспорт. - https://www.uzbekistan.org/page/view?id=29
Унда 6- ва 9-талаблар қуйидагича ёзилганди.

«Гражданам Республики Узбекистан для оформления биометрических паспортов необходимо предоставить нижеследующий перечень документов:

6. Документ (вместе с копией), подтверждающий легальность пребывания гражданина РУ на территории иностранного государства (виза, вид на жительство, оригинал "грин-карты" (вместе с копией));

9. В случае утери паспорта, заявитель представляет справку из правоохранительных органов страны пребывания об обращении заявителя по поводу утери паспорта и заявление с подробным указанием обстоятельств утери паспорта.» https://www.uzbekistan.org/page/view?id=29

Бу матннинг ўзбек тилига таржимаси.

“Биометрик паспортни расмийлаштириш учун Ўзбекистон Республикаси фуқаролари қуйидаги ҳужжатларни тақдим қилишлари шарт:

6. Ўзбекистон Республикаси фуқароси хориж давлат ҳудудида қонуний эканлигини тасдиқловчи ҳужжат (нусхаси билан) (виза, яшаш учун рухсатнома, "грин-карта"нинг асл нусхаси (нусхаси билан));

9. Паспортни йўқотиб қўйган ҳолда аризачи паспортини йўқотиб қўйганига доир ўзи яшаётган мамлакат ҳуқуқни муҳофаза қилиш органларига мурожаат қилганига доир маълумотнома ва паспортни йўқотиб қўйиш ҳолатига доир батафсиз ёзилган аризани тақдим қилади;”

Мана шу талаблардан келиб чиқиб олдин АҚШ янги грин-картасини олишга ҳаракат қила бошладим. Янги грин-карта олишим учун АҚШ Полиция раҳбариятига олдинги грин картам қандай йўқ бўлганлиги, яъни ўғирланганига доир аризани инглиз тилида ёзишим керак экан.

Юқорида таъкидлаганимдек, грин картамни ўғирлашни АҚШ Федерал қидирув бюроси (ФҚБ) агентлари тунда ухлаётганимда наркоукол қилиш ва наркосўроқ ўтказиш давомида уюштирган, деб ҳисоблайман. Бундай битта ҳолат билан ФҚБ агентлари жиноятини исботлай олмаслигим аниқ эди.

АҚШда 2012 йил ноябрдан 2024 йил июлга қадар менга қарши 30 марта ўғирлик ва 6 марта босқинчилик уюштиришди. Ушбу жиноятларни 2010 йилдан бери кечаю-кундуз мени кузатаётган фуқаро кийимидаги шахслар, менимча, АҚШ Федерал қидирув бюросининг айрим агентлари ва улар билан боғлиқ шахслар уюштиришаётганини таҳлил қилиб тушундим. 2021 йил сентябрдан бошлаб полиция раҳбариятига ушбу ўғирликлар ва босқинчиликларни кимлар ва қандай уюштирганига доир воқеаларни ҳужжатлар ҳамда фактлар асосида катта ариза-шикоятимда таҳлил қилиб ёза бошладим.

Аризам-шикоятимни инглиз тилига таржима қилиш осон ва сифатли бўлиши учун уни рус тилида ёздим. Унинг дастлабки варианти 81 банддан иборат 39 бетни ташкил қилди. Мен уни 2021 йил 21 октябр куни ёзиб тугатдим ва элчихонамизга бердим. Менимча, улар 39 бетлик Ариза-шикоятимдан ксерокс қилиб нусха олишди.

2021 йил 21 октябр куни Фахриддин Мўминов билан бўлган салом-аликдан кейин мен вазиятни қисқача тушунтирдим ва 2021 йил 24 октябр кунги президентлик сайловларида қатнашмоқчи эканлигимни айтдим. Унга паспортим сурати ёпиштирилган ва асосий маълумотлар ёзилган саҳифа нусхаси (фото 2), 2018 йил сентябрда ўғирланган грин-картам ва ижтимоий таъминот карточкамдан олинган нусха (фото 5), шунингдек рус тилидаги 39 бетли ариза-шикоятимни бердим. У «Ҳозир аниқлаштираман» деб ичкарига кириб кетди. Фахриддин Мўминов АҚШ фуқаролигини мен олган-олмаганлигимни текшириш учун кириб кетди, деб ўйладим.

Бу орада Комил исмли 30 ёшлардаги йигит фотокамерасини менга тўғрилаб президентлик сайловларига доир қисқача интервю беришимни илтимос қилди. Мен рози бўлдим. Мен 2016 йил 4 декабрдаги президентлик сайловлари куни АҚШдаги Ўзбекистон элчихонаси қаршисида пикет қилганим ва унда плакатда ёзилган ноҳақ қамалган 43 нафар инсон ҳуқуқи ҳимоячилари, журналистлар, шунингдек имом Руҳиддин Фахриддиновнинг қамоқдан озод қилинишини талаб қилганим, сайлов ўтгач бир йил давомида, адашмасам, уларнинг барчалари қамоқдан озод қилингани ва улар ўз оилалари бағрига қайтганини айтиб, сайловда қатнашмоқчи ва президент Шавкат Мирзиёевга овоз бермоқчи эканлигимни айтдим.

2021 йил 21 октябр куни Фахриддин Мўминов менга Ўзбекистоннинг марҳум президенти Ислом Каримовнинг 2015 йил 22 майдаги ПФ-4727 рақамли фармони асосида мен Ўзбекистон фуқаролигидан маҳрум қилинганимга доир инглиз тилида ёзилган варақни берди (фото 1).

Мен инсон ҳуқуқлари ҳимоячиси сифатида биламанки, «Ўзбекистон Республикаси фуқаролиги тўғрисида” номли қонуннинг 4-моддасида бундай ёзилган.

“Ўзбекистон Республикаси фуқаролигига қабул қилиш, Ўзбекистон Республикаси фуқаролигини тиклаш, Ўзбекистон Республикаси фуқаролигидан чиқиш ёки Ўзбекистон Республикаси фуқаролигини йўқотиш тўғрисидаги қарорлар Ўзбекистон Республикаси Президенти томонидан фармонлар тарзида қабул қилинади ва имзоланган кундан эътиборан кучга киради.” (www.lex.uz/acts/4761984 March 13, 2020)

Менича, менинг исми-шарифим ёзилган ва Ўзбекистоннинг марҳум Президенти Ислом Каримов ҳам, бугунги кунда Ўзбекистон Президенти бўлмиш Сиз – Шавкат Миромонович ҳам имзо қўймагансизсизлар, яъни бундай расмий ҳужжат йўқ. Баъзи бир юқори мансабли амалдорлар Ислом Каримовнинг 2015 йил 22 майдаги PF-4727 рақамли Фармонини рукач қилиб, фақат Ўзбекистон Президентига берилган ваколатни суиистеъмол қилиб, ўзларига ёқмаган ўзгача фикрловчи Ўзбекистон фуқаросини бундай қора рўйхатга киритишмоқда ва Ўзбекистон фуқаролигидан, яъни Ватанидан маҳрум қилишмоқда.

Мен ушбу ҳужжатга ким имзо қўйганини сўрадим ва ўша ҳужжат нусхасини беришни илтимос қилдим. Фахриддин Мўминов бу саволимга жавоб бераолмади. У менга рус тилидаги «Заявление-анкета на оформление биометрического паспорта для выезда за границу» номли бланка берди ва ундаги саволларга жавоб ёзишим кераклигини айтди. Бу пайтда соат 18:00 дан ўтганлиги сабабли “Анкетани ёзиб эртага олиб келарсиз” деди. Мен уйга жўнаб кетдим.

Мен 2012 йил март ойида Бойсе шаҳридан Вашингтонга кўчиб келганимдан кейин йилига бир-икки марта элчихонамиз олдида пикет қилдим. 2016 йил 4 декабрдан бошлаб қилган пикетларимда талабларим матнини ёзиб элчихонага берганман. Унда исми шарифим, АҚШдаги яшаш манзилим, электрон почтам ва бошқа ўзимга доир маълумотларни ёзганман.

Қамоқда 2015 йилдан бери азоб чекаётган Гулнора Каримова 2017 йил 8 июл куни 45 ёшга тўлди. Мен 2017, 2018, 2019, 2020, 2021, 2022 ва 2023 йил 8 июл кунлари элчихонамиз олдида пикет қилиб у танлаган адвокатлар иштирокида адолатли суд қилиниши ёки уни озод қилинишини талаб қилдим. Ҳар сафар элчихонадан Фахриддин Мўминов ва бир-икки ходим чиқиб мен билан қисқача суҳбатлашди, баъзан талабномамни олиб қолишган, баъзан уни элчихонанинг хатлар қўтичасига солдим. Лекин улар консуллик рўйхатидан ўтишим кераклиги ва бунинг учун яна қандай маълумотлар зарур эканлиги ҳақида бирор марта менга айтган эмас.

Эътибор беринг: 2021 йил 7 июл куни биометрик паспорт олишим учун керакли ҳужжатларни беришимни илтимос қилишди. Шундан уч ой ўтгач, аниқроғи 2021 йил 21 октябр куни менга Ўзбекистон фуқаролигидан маҳрум қилиш ҳақидаги ҳужжатни беришди. Савол туғилади: сабаби нимада? Сабаби шундаки, мен ўзимнинг 314 бетлик катта шикоят-аризамни 2021 йил сентябрдан ёза бошладим ва унда Ўзбекистон Миллий хавфсизлик хизмати (2017 йилдан кейин Давлат хавфсизлик хизмати (ДХХ)) АҚШ Федерал қидирув бюроси (ФҚБ) билан ҳамтовоқлик қилаётгани ва улар менга қарши уюштирган айрим жиноятлар тарихини ёза бошладим. ФҚБ агентлари ва Ўзбекистон ДХХси зобитлари ноутбуким (компютерим)ни туну кун назорат қилишаётгани, ёзаётган шикоят-аризам ва бошқа матнларни ўқишаётгани ва ушбу ёзув давомида жиноятларни озми-кўпми фош қила бошлаганлигимни билишарди. Шу сабабли улар 2021 йил 21 октябрда Ўзбекистон фуқаролигидан маҳрум қилиш орқали мендан қутулишга қарор қилишди, менимча. Шундан сўнг тазйиқлар, провокациялар, ҳатто мени дарди бедаво касал қилиб ўлдириш учун ҳар хил усуллар билан заҳарлашлар уюштириш янада кучайди. Улар анчадан бери еяётган ноним, овқатим ва ичаётган чой, сув, ичимликларга тегишли заҳарларни қўшиш орқали асосан буйрагим, шунингдек жигаримни заҳарлаш билан шуғулланишмоқда. Улар қўллаётган заҳарлаш ҳолатлари ҳақида 314 бетлик шикоят-аризамда ёзганман.

Катта шикоят-аризамда кўпгина муҳим фактлар, воқеалар ҳақида ёзганим, шунингдек муҳим ҳужжатлар ва фотоларни илова қилганим сабабли унинг рус тилидаги тўлиқ иккинчи варианти 314 бетни ташкил қилди.

314 бетлик шикоят-аризамнинг инглиз тилидаги таржимаси 282 бетни ташкил қилди. Уни яқин ҳафталарда кўздан кечириб, АҚШ ва Ўзбекистон раҳбариятига, инсон ҳуқуқини ҳимояловчи халқаро ташкилотларга ва оммавий ахборот воситаларига жўнатаман, иншааллоҳ.

Каримов 2015 йил 22 май куни имзолаган ПФ-4727 (ПУ-4727) фармони асосида мени Ўзбекистон фуқаролигидан маҳрум қилишгани ёзилган. Мен қонунлар чоп қилинадиган сайтларда, жумладан www.lex.uz сайтида фармон матнини изладим. Лекин ушбу фармон сайтларда йўқ. Ўзбекистон Миллий хафсизлик хизмати раҳбарияти бундай муҳим фармонни www.lex.uz норматив сайтида чоп қилишга рухсат бермаганга ўхшайди.

Ҳуқуқий давлатда Президент имзолаган фармонда, қонунда унинг кучга кириш муддати ҳам ёзилади. Масалан, Сиз 2020 йил 1 март куни имзолаган “Ўзбекистон Республикасининг фуқаролиги тўғрисида»ги Ўзбекистон Республикаси қонунининг 58-моддасида бундай ёзилган.

“58-модда. Ушбу Қонуннинг кучга кириши
Ушбу Қонун расмий эълон қилинган кундан эътиборан олти ой ўтгач кучга киради.
Ушбу Қонуннинг 6, 45-моддалари ва 55-моддасининг 1-банди 2020 йил 1 апрелдан эътиборан амалга киритилади» (lex.uz/acts/4761984 )

Ўзбекистоннинг АҚШдаги консули-биринчи котиби Фахриддин Мўминов менга 2021 йил 21 октябр куни берган варақда раҳматли Ислом Каримов 2015 йил 22 май куни имзолаган ПФ-4727 (ПУ-4727) фармони ҳақида ёзилган. Лекин ушбу Фармон lex.uz, Ўзбекистон Республикаси Қонун ҳужжатлари каби бирорта манбада эълон қилинган эмас. Агар чоп қилинган бўлганида ўтган тўққиз йил давомида инсон ҳуқуқлари ҳимоячилари, адвокатлар, суд ҳокимияти ходимлари ва бошқалар у ёки бу даражада муҳокама қилган бўларди. Эслатиб ўтаман: ушбу Фармонда давлат ва маълум бир фуқаро ўртасидаги айрим муносабатлар ёзилган, яъни бирорта давлат ёки ҳарбий сир йўқ!

Хуллас калом, 2015 йилдаги ПФ-4727 (ПУ-4727) фармони матбуотда эълон қилинган эмас. Демак, у қонуний кучга эга эмас. Шу сабабли Фахриддин Мўминов каби амалдорлар ушбу Фармонга тавсия қилиб ёзган варақлар ҳам қонуний кучга эга эмас.

Ўзбекистон фуқаролигидан мени ноҳақ ва қонунга зид равишда маҳрум қилишганлиги сабабли мен 2021 йил 22 октябр куни сизнинг номингизга шикоят ёздим ва элчихона котибига топширдим. Шикоятимга жавоб келмади.

Мен Ўзбекистон Президенти сайловлари куни бўлмиш 2021 йил 24 октябр куни Ўзбекистоннинг Вашингтондаги элчихонасига бордим. У ерда Жамшид Мирзабоев менинг шикоятимга доир Тошкентдан жавоб келмаганини айтди. Мен ундан ПФ-4727 (ПУ-4727) фармонини кўрсатишни илтимос қилдим. У ушбу фармон ҳақида билмаслиги ва унда унинг нусхаси йўқлигини айтди. Жамшид Мирзабоев билан 2021 йил 21 ва 24 октябр кунлари бўлган суҳбатлардан у Ўзбекистон Давлат хавфсизлик хизмати билан боғлиқ шахс, деган тассаввур менда ҳосил бўлди.

Менинг исмим ва фамилиям ёзилган, Ўзбекистоннинг дастлабки Президенти раҳматли Ислом Каримов, ёки 2017 йил январдан бери Ўзбекистон Президенти лавозимида ишлаётган Сиз – Шавкат Миромонович Мирзиёев имзолаган ҳужжат мавжуд эмас. Мен 2021 йил октябрдан бери жуда кўп марта бундай ҳужжат нусхасини оғзаки ҳам, ёзма шикоятларимда ҳам сўрадим. Бундай ҳужжат бор-йўқлиги ҳақида ҳам, қачон ва ким имзолагани ҳақида ҳам менга аниқ ҳужжат асосида маълумот беришмади.

Менинг исмим ва фамилиям ёзилган, Сизнинг ёки Ислом Каримовнинг имзоси қўйилган шундай ҳужжат бўлмасада, Президент ваколатига кирувчи ҳуқуқни ўзларига олиб, мени Ўзбекистон фуқаролигидан маҳрум қилишди. Менга бу ҳақда 2021 йил октябрда айтишди. Бу адолатсиз ва қонунга зид қарордир.

Мен Сизнинг номингизга шикоят аризамни 2021 йил 22 октябр, 2022 йил 5 декабр ва 2023 йил 7 декабр куни Ўзбекистоннинг Вашингтондаги элчихонаси ходимлари орқали юборгандим. Лекин ҳеч қандай жавоб келмади. Шу сабабли ушбу тўртинчи шикоят аризамни Очиқ хат кўринишида ёздим.

Хуллас калом, Давлат хавфсизлик хизмати ва прокуратура билан боғлиқ қайсидир амалдорлар менга нисбатан адолатсиз қарор чиқарган ва мени Ўзбекистон фуқаролигидан маҳрум қилган.

Ҳурматли Шавкат Миромонович! Илтимос, ушбу адолатсиз қарорни бекор қилинишига ва Ўзбекистон фуқаролигини сақлаганлигимни тасдиқланишига ёрдам берсангиз. Ушбу илтимосим амалга ошса, 2024 йил 27 октябр кунги Ўзбекистондаги Парламент сайловларида қатнашиш ва овоз бериш ниятим бор, иншааллоҳ.

P.S. Эслатиб ўтаман: мен 1974 йилдан бери инсон ҳуқуқларини ҳимоя қилиш билан шуғулланиб, минглаб ватандошларимни адолат йўлида ҳимоя қилганман. 2001 йилдан бери интернет сайтларда 386 тта мақола, жумладан ўзбекча 276 та, русча 93 та, инглизча 17 та мақола ва ўзбекча олтита китоб ёзиб чоп қилган, 2024 йил январда 70 ёшни қаршилаган ўзбек зиёлисиман. Ўз ватаним Ўзбекистон учун фойдали ишлар қилишга ҳаракатимни давом қиламан, иншааллоҳ. Бунинг учун Ватан эшиклари мен учун очиқ туриши, яъни фуқаролигим сақланиши жуда муҳимдир.

ДАВОМИ БОР