Шуҳратжон АҲМАДЖОНОВ

ЖЎРАЕВЛАР ВА ҚОДИРОВ МОЖАРОСИ: МУАММО ВА УНИНГ ЕЧИМИ


Фото 1. Ўзбекистон Маданият вазири Озодбек Назарбеков: «Учта тирранча буюк санъаткорни лойга булғаяпти”. [1]

МАҚОЛАМ МУНДАРИЖАСИ
Кириш сўзи.
1. Можаронинг дастлабки тафсилоти.
2. Шерали Жўраевнинг муносабати.
3. Ҳалимжон Нурматовнинг муносабати.
4. Айрим мулоҳазаларим.
5. Муҳим маслаҳатларим.
6. Суд натижаси қандай бўлади?
7. Инсон ҳуқуқлари бўйича Европа судига шикоят аризаси.
Фойдаланилган адабиётлар.

ИЛОВА МУНДАРИЖАСИ
Шeрали Жўраев (параграф 47.7-47.8). Китобнинг тузатилган ва тўлдирилган 4-нашри
47.7. 2007-2023: Бошқа ўғли ҳақидаги миш-миш.
47.7.1. Миш-миш қандай тарқатилди?
47.7.2. Бозорларда миш-миш қандай уюштирилади?
47.7.3. Ботир Қодиров ҳақида маълумот.
47.7.4. Шерали Жўраевнинг муносабати.
47.7.5. Шoҳжаҳoн ва Зoҳиршoҳнинг муносабати.
47.7.6. Қўшимча маълумот.
47.7.7. Бoшқа ўғли ҳақидаги миш-мишдан мақсад.
47.7.8. Муаммони ҳал қилиш йўли.
47.7.9. Қариндошликни аниқлаш учун ДНК тестлари.
47.7.10. Шоҳжаҳон ва Зоҳиршоҳга мурожаатим.
47.8. Миш-миш тарқатувчиларга муносабати.
Улардан қоч. Шeрали Жўраев қўшиғи.
Илова учун фойдаланилган адабиётлар.

КИРИШ СЎЗИ

“Ботир Қодиров Шерали Жўраевнинг ўғли” деган миш-мишлар ва гап-сўзлар 2007-2023 йилларда ҳар хил йўллар билан кўп марта тарқатилди. Улуғ ҳофиз Шерали Жўраев 2023 йил 4 сентябр куни вафот қилгач бу миш-мишлар яна авж олди. Ботир Қодиров 2024 йилнинг 19 март куни Фуқаролик ишлари бўйича Учтепа туман судига ариза киритди.

1. МОЖАРОНИНГ ДАСТЛАБКИ ТАФСИЛОТИ

“Дарё” манбасининг билдиришича, санъаткорлар ўртасидаги можаро Фуқаролик ишлари бўйича Учтепа туман судида, судья Лола Ўтанбоева раислигида кўриб чиқилмоқда.

Даъвогар Қодиров Ботир Шералиевич жавобгарлар — Шоҳжаҳон ва Зоҳиршоҳ Жўраевлардан оталикни белгилашни талаб қилган.

Аниқлаштирилишича, Ботир Қодиров 2024 йилнинг 19 март куни судга ариза киритган. Ишни кўриш 15 апрель куни бошланган. Бироқ жавобгар вакили иш билан танишиш учун ишни кўришни бошқа кунга қолдиришни сўрагани сабабли суд мажлиси бугун, 23 апрель соат 14:30 га қолдирилган.

Билдирилишича, бугунги судда даъвогар вакилининг кўрсатмаси эшитилган. Гувоҳларни ишга жалб этиш ва қўшимча далиллар — фотосуратлар, далолатнома ёзуви ва туғилганлик ҳақидаги гувоҳноманинг асл нусхасини талаб қилиб олиш учун иш яна қолдирилган.

Ботир Қодировнинг даъво аризасига Адлия вазирлиги ҳузуридаги Сулаймонова номидаги Республика суд экспертиза марказининг 2023 йил 29 сентябрдаги хулосаси ва ундаги мутахассис фикри илова қилинган. Унда Ҳалимжон Нурматов ва Қодиров Ботир Шералиевичнинг амаки-жиян эканлиги бўйича фикр берилган.

Ботир Қодиров 2008 йил Янгийўл туман ФҲДЁ бўлимига мурожаат қилиб, 26 февраль куни фамилиясини Жўраевдан Қодировга, отасининг исмини Шерали ўғлидан Шералиевичга ўзгартирган. Бу ҳақда ҳам судга ҳужжатлар тақдим этилган.

Суднинг навбатдаги мажлиси 2024 йилнинг 2 май куни соат 15:00 га қолдирилган.» [2]

2. ШЕРАЛИ ЖЎРАЕВНИНГ МУНОСАБАТИ

“Ботир Қодиров Шерали Жўраевнинг ўғли” деган миш-миш ва гап-сўзларга нисбатан Шерали ака ўз муносабатини билдириб, 2007 йил 13 феврал куни Андижон вилоятида яшаётган Шавкатбек Аҳмадбек ўғлининг никоҳ тўйида муҳим гапларни айтганди. Мен бу матнни ўша тўй дискидан 2010 йил 2 январ куни блокнотимга кўчириб ёзиб олдим. Сўзма-сўз келтираман.

“Бир-иккита биз ўзимиз нон бериб катта қилган одамлар бор эди. Ҳозир улар энди полковник даражасига кўтарилдию, ишдан энди бўшаган ҳозир. Шуни айтиб қўйишим керак сизларга.

Шу одам менинг уйимга бир ўн йил, йўқ, боринг, етти йил бўлди, бормайди. Мендан хабар ҳам олмайди.

Шуни ҳам айтиб қўяй. Яна бир ... болани етаклаб юраркан. “Шералининг ўғли” деб пул қиларкан.

Ман қирққа кирганимда ўғил кўрганман – Шоҳжаҳон (қарсаклар). Қирққа кирганимда ман ўғил кўрганман. Биринчи кўрган фарзандим шу. Ундан аввал ман фарзанд кўрмаганман, ҳов биродарлар.

У айтадиган боласи ўзига тенг, ҳалиги жўранинг ўзига тенг.

Хуллас, у айтадиган боланинг жуда отаси кўп, ҳов биродарлар (қарсаклар). Бир бешта, ўнта одамнинг олдига олиб бориб, “Сенинг ўғлинг” деб, пул олган оналари.

Шунинг учун мен сизларга очиқ-ойдин, Аллоҳнинг олдида айтаяпман бу гапни.

Бунақа тирикчилик қиладиганларни шундай ушланглар. Шерали Жўраевнинг ўғли танбур чалади, дутор чалади, соз чалади, тор чалади. Уни билиш учун саҳнага чиқариб қўйиб, қўлига тор беринг, танбур беринг, дутор беринг. Чалолса, менинг ўғлим бўлади (қарсаклар).

Ҳар битта менга ўхшаган менинг ўғлим бўлавермайди-да. “Сен берироқ кел, берироқ кел, ўғлим, тепага чиқ” (18 ёшлардаги йигит саҳнага чиқди, А.Ш.). Мана шуни ҳам менинг ўғлим, деса, ишонаверади одамлар. Сабаби – менга ўхшайдида. Бу Андижоннинг 90 фоизи бир-бирига ўхшайди. Шуни айтиб қўяй.

Ҳали Нуриддин (Ҳайдаров)ни менинг ўғлим, деб айтишган, Аҳрор (Усмонов)ни менинг ўғлим, деб айтишган. Улар мендан етти ёшга кичик, холос (даврада кулгу, А.Ш.).

Шунинг учун, биродарлар, мана камера ҳам олаяпти. Шуни чиқариб қўяверинглар. Шу гапларимни халқ билсин (қарсаклар).

Менда иккита ўғил бор. Шоҳжаҳон – 18 га энди кирди. Кейингиси эса Зоҳиршоҳ, деб от қўйганмиз. Униси энди 16 га кирди. Мана янги йилда (2007 йил бошида, А.Ш.) ака-ука қўшилишиб “Замон-замон”ни айтишди. Шундан бошқа менда ўғил йўқ, айтиб қўяй.

Тўйга олиб бораркан. “Шерали Жўраевнинг ўғлини олиб келдим” деб пул оларкан ҳалиги тўй эгасидан. Одамларга “Ҳозир Шералининг ўғли чиқади” деб эълон қилади ўртада эълончи. Менинг ўртоқларим, сизларга ўхшаган шинавандалар “Шерали Жўраевнинг ўғли келиб қолибди” деб уч-тўрт сўм қистиришади. Шунга ишқибоз у ҳаромилар.

Мен шуни айтишим керак эди. Шуни айтмасам бўлмасди. Мен бу ерларга энди қачон қайтиб келаман.

Мен шуни айтишим керак эди. Сизлар билишларинг кераклиги учун айтаяпман. Жуда зарил эмас. Лекин айтишим керак эди” [3]

Менимча, Шерали Жўраев оғзаки гапириш билан чегараланмай, адвокатларни жалб қилиш орқали Шерали Жўраевнинг ўғлига даъвогарлик қилаётган кимсанинг ҳужжатларини аниқлаштирди. Катта суд жанжали бошланишини ва бу судда шармандали мағлуб бўлишини тушунган Ботир Қодиров ўз тарафдорлари тавсияси билан Тошкент вилояти Янгийўл туман Фуқаролик ҳолати далолатномаларини ёзиш (ФҲДЁ) бўлимига мурожаат қилиб, 2008 йил 26 феврал куни фамилиясини Жўраевдан Қодировга, отасининг исмини Шерали ўғлидан Шералиевичга ўзгартирди. [2]

3. ҲАЛИМЖОН НУРМАТОВНИНГ МУНОСАБАТИ


Фото 2. Ҳалимжон Нурматов (Шерали Жўраевнинг укаси): «Мен ҳеч қандай ДНК тестига бормаганман. Ботир Қодиров бизга қарашли одам эмас. Мен айнан ДНКга тест топширганимни эслай олмайман. Лекин кўзимни даволатамиз деб шифохонага олиб боришган. Кўзимдан бир-икки нарса олди. Нимага олганини билмайман. Бу бола бизнинг уруғдан эмас.» [4]

“Даъво аризасига Ўзбекистон Республикаси Адлия вазирлиги ҳузуридаги Сулаймонова номидаги Республика суд-экспертиза марказининг 2023 йил 29 сентябрдаги мутахассис фикри илова қилинган. Унда Ҳалимжон Нурматов билан Ботир Шералиевич Қодировнинг амаки-жиян эканлиги бўйича фикр берилган.

QALAMPIR.UZ ушбу мавзуга ойдинлик киритиш мақсадида Шерали Жўраевнинг укаси Ҳалимжон Нурматов билан боғланди. Буни қарангки, у Ботир Қодиров билан амаки-жиян эканини аниқлаш учун ДНК текшируви ўтказилганини рад этмоқда.

Абдураҳмон Эргашев, мухбир – Бир неча йил аввал Ботир Қодиров билан бирга "амаки-жиян" эканингизни аниқлаш учун ДНК анализи топширган экансиз. Шу ҳақда маълумот бера оласизми?

Ҳалим Нурматов (Шерали Жўраевнинг укаси) – Мен ҳеч қандай ДНК тестига бормаганман. Ботир Қодиров бизга қарашли одам эмас. Мен айнан ДНКга тест топширганимни эслай олмайман. Лекин кўзимни даволатамиз деб шифохонага олиб боришган. Кўзимдан бир-икки нарса олди. Нимага олганини билмайман. Бу бола бизнинг уруғдан эмас. Агар у бизнинг жиянимиз бўлганда, шунча вақтдан бери бир марта ҳам хабар олмасмиди?

Бизда "Отанг бор уйнинг томига чиқма", деган қонун-қоида бор. Бир пайтлари биз Ботир Қодировни жуда яхши кўриб юрардик. Агар Шерали Жўраев унинг отаси бўлганида, ҳозирги гаплар бўлмасди. Ҳамма Шер акани ёмонлаяпти. У ҳам қарши томонда қўшилишиб гапирмоқда. Ким отасини ёмонласа, индамай қўшилади? Демак, унинг отаси эмас. Демак, у мол-дунёгами, нимагадир интилиб отам деяпти. Унга ота ҳам керак эмас.

А.Э.: — Бундан 30 йиллар олдин Андижондаги тўйда Ботир Қодиров Шерали Жўраевнинг ўғли эканини айтгансиз.

Ҳ.Н.: — Мен ундай демаганман. Андижонликлар шундай деб юрар эди.

А.Э.: — Сиз Шерали Жўраевнинг укаси сифатида Шералиевич Ботир Қодировни ҳақиқатдан ҳам акангизнинг ўғли эканига гувоҳлик берасизми?

Ҳ.Н.: — Йўқ. Унинг ўғли эмас. Шер ака “у менинг ўғлим эмас бу, ҳаромидан бўлган бу”, деган видеоси ҳам бор керак бўлса. Ўшанда биз ҳам Шерали Жўраев билан бирга тўйда хизматда эдик. Шерали Жўраев тан олмаса, мен қандай унинг ўғли дея оламан. Мен Ботир Қодировни беш ёшида кўрганман. Унинг холаси бор, ўша билан бирга кўрганман. Агар Шерали Жўраев бутун оламга “бу менинг ўғлим эмас”, деб айтмаганида эди, Шер аканинг ўғли экан деган бўлар эдик. Агар ўша вақтлардан одамлар орасида “бу Шерали Жўраевнинг ўғли”, деган гап бўлмаганда, Шер аканинг номи бўлмаганида, бу бола машҳур ҳам бўлмас эди. Ақли бўлганида, судма-суд югурмасдан қўшиқ айтиб юравериш керак эди.

А.Э.: — Биздаги маълумотларга кўра, Шоҳжахон ва Зоҳиршоҳ Жўраевлар Ботир Қодировнинг онасининг шаънига ёмон гаплар айтган. Қодиров ҳам онасининг номини оқлаш мақсадида ҳақиқатдан ҳам Жўраевнинг фарзанди эканини даъво қилиб, судга мурожаат қилган.

Ҳ.Н.: — Ботир Қодировнинг онаси ёмон аёл эмасди. Қодиров Шерали Жўраевнинг ўғлими йўқми, уни Шер аканинг ўзи билади.” [4]

4. АЙРИМ МУЛОҲАЗАЛАРИМ

1. Ботир Қодиров 1981 йил 5-май куни Андижонда туғилганини ҳисобга олсак, бу можарога 43 йил аввал асос солинган ва ўшандан бери давом қилмоқда.

2. Шерали Жўраев 2007 йил 13 феврал куни Андижон вилоятида яшаётган Шавкатбек Аҳмадбек ўғлининг никоҳ тўйида айтган муҳим гапларга эътибор берсак, бу можаро бошида Совет Иттифоқининг КГБ (Комитет государственной безоасности – Давлат хавфсизлиги қўмитаси) полковниги даражасидаги кучишлатар органи раҳбарияти тургани ва бош-қош бўлишгани маълум бўлади.

3. Шерали Жўраев 1968 йилдан бошлаб “Ўзбегим” ва шунга ўхшаш Аллоҳ, Ислом дини талаблари билан боғлиқ қўшиқлар куйлагани учун уни ва шеър муаллифи Эркин Воҳидовни Совет Иттифоқининг КГБ ташкилоти қаттиқ тазйиқ қилиб, уларни тавба қилишга мажбурлай олмаганди. КГБ ташкилоти ва унинг издоши ҳамда давомчиси бўлган Ўзбекистон Миллий хавфсизлик хизматининг айрим раҳбарлари ўзгача фикрловчи зиёлиларни синдириш мақсадида кўпинча уларнинг оила аъзолари орасида мажоро келтириб чиқаришга ҳаракат қилишган.

3. Ботир Қодиров ўз интервюларида онасининг шаъни, ор-номуси ва ўзининг қадр-қимматини ҳимоя қилиш мақсадида, оталик фактини белгилаш учун даъво аризаси билан судга мурожаат қилганини таъкидламоқда.
Шоҳжаҳон ва Зоҳиршоҳ Жўраевлар ўз интервюларида Шерали Жўраев 2007 йил 13 феврал куни Андижон вилоятидаги тўйда Ботир Қодировга доир айтган гапларига ишонишларини ва ўз отаси Шерали Жўраев шаънини ҳимоя қилаётганликларини таъкидлашса яхши бўлади.

4. Мен 2008 йил май ойида Андижонга бориб, улуғ ҳофиз Шерали Жўраевга доир қизиқарли маълумотларни тўпладим. Ўшанда Шерали ака айтган истеъфодаги полковник билан ҳам суҳбатлашдим, ундан кўпгина қизиқарли маълумотларни олдим ва Ботир Қодиров ҳақида баҳслашдик. У Шерали ака билан қўшилиб ҳамма тўйларга, концертларга боргани ҳақида, Шерали Жўраев ҳақида “Қўшиқ сеҳри” номли китобни 2004 йилда ёзиб нашр қилгани, битта нусхасини Шерали акага совға қилгани ҳақида айтди. У ўша китобидан биттасини менга совға қилиб берди. У ўшанда Ботир Қодировни тўйларга олиб бораётгани ҳақида ҳам айтганди. Лекин у ўзининг полковник унвонида эканлигини айтмади. Айтса, мен унга қўшимча саволлар берган бўлардим.

У ўз идорасига борганида унинг раҳбари “Шералинг ўз ўғлини тан олмабдику” дея бир мушт туширганини ҳам айтганди. Унинг ҳақидаги батафсилроқ маълумотларни “Шерали Жўраев” номли китобимнинг бешинчи нашрида ёзаман, иншааллоҳ.

5. Мен “Шерали Жўраев” номли китобимнинг учинчи ва тўртинчи нашрларида 2007 йилдан бошлаб Ўзбекистонда Шeрали Жўраевнинг бошқа ўғли борлиги ҳақида янги миш-миш тарқала бошланганлиги ҳақида ёздим. Бунга доир китобимнинг 47.7-47.8-параграфларини мақолам охирида ИЛОВА сифатида келтирдим ([6]-га қаранг). Унда ушбу можаро ҳақида кўпгина фактларни ёздим ва таҳлил қилдим.

5. МУҲИМ МАСЛАҲАТЛАРИМ

1. 2007 йил 13 феврал куни Андижон вилоятида яшаётган Шавкатбек Аҳмадбек ўғлининг никоҳ тўйи видеоси топилсин.

2. Шерали Жўраев Ботир Қодиров ҳақида гапирган видео қисми ажратиб олиб ижтимоий тармоқларга жойлаштирилсин.

3. Ушбу видео қисм “Жўраевлар” номли сайтда ҳам бор. Лекин унда Шерали Жўраев гапирган гаплар тўлиқ эмас. Видео сифати паст бўлиб, унда Шерали ака тасвири аниқ-тиниқ эмас.

4. Шерали Жўраев Ботир Қодиров ҳақида гапирган видео қисми судъяга топширилсин ва уни суд ишига илова қилиш талаб қилинсин. Бу ишни адвокат орқали амалга ошириш маъқулдир.

Мен 1-4-бандлар билан боғлиқ “Можарога доир видеони топайлик. Мурожаатим” номли алоҳида мақола ёзиб, 2024 йил 29 апрел куни Фейсбукдаги саҳифамда ва ўнта гуруҳ саҳифаларида чоп қилдим ([5]-га қаранг).

6. СУД НАТИЖАСИ ҚАНДАЙ БЎЛАДИ?

1. Ботир Қодировни кўп йиллардан бери қўллаб-қувватлаётган кучишлатар органлар 2024 йилги суд жараёнларига анча пухта тайёргарлик кўришган. Улар Шерали Жўраевнинг укаси бўлмиш Ҳалим Нурматовни кўзини даволатиш баҳонасида шифохонага олиб боришганида унинг кўзидан бир-икки нарса олишган. Шунинг асосида Сулаймонова номидаги Республика суд экспертиза марказида ДНК тестини яширинча ўтказишгани, унинг 2023 йил 29 сентябрдаги хулосаси борлиги, “Ҳалим Нурматов ва Ботир Қодиров амаки-жиян эканлиги 94 фоизга тасдиқланганини” Ботир Қодиров ўз интервюларида айтди.

Менимча, халқпарвар Президентимиз Шавкат Мирзиёев ислоҳотлари етиб бормаган идоралардан бири – бу Сулаймонова номидаги Республика суд экспертиза марказидир. Ахир Республика суд экспертиза маркази Ботир Қодиров ва Ҳалим Нурматовни бевосита Республика суд экспертиза маркази чақириб, экспертиза учун улар оғзи бўшлиғидан сўлаги намунаси олгач экспертиза таҳлили ўтказилмади. Ахир кўз дўхтири хонасида Ҳалим Нурматовдан яширин олинган намуна бошқа инсон намунаси билан алмаштириб қўйиш осон ишку. Соддароқ қилиб айтганда, Ҳалим Нурматовдан олинган намунани Ботир Қодировнинг 22 нафар фарзандидан биридан олинган намуна билан алмаштириб қўйиш ҳам мумкинку. Эксперт бу айнан кимнинг сўлаги намунаси эканини ажрата олмайди.

Жўраевлар адвокати мана шу ҳолатни айтиб, Ботир Қодиров ва Шоҳжаҳон (ёки Зoҳиршoҳ)
Жўраевнинг ДНК анализи қайтадан ўтказишни талаб қилиши мумкин.

Судъя суд мажлисида Шоҳжаҳон (ёки Зоҳиршоҳ) Жўраев ва Ботир Қодировга нисбатан қўшимча ДНК текширувини ўтказиш ҳақида қарор чиқариши мумкин.

Кўп йиллардан бери Ўзбекистондаги ҳақиқий вазиятни ва Сулаймонова номидаги Республика суд экспертиза марказида муҳим ўзгаришлар бўлмаганлигини ҳисобга олсак, навбатдаги хулоса ҳам айнан олдинги каби бўлиши шубҳасиздир.

Алал-оқибат Фуқаролик ишлари бўйича Тошкент шаҳар Учтепа туман суди судъяси 2024 йил май ойида бўладиган судда “Ботир Қодиров Шерали Жўраевнинг ўғли” эканлиги ҳақидаги қарорни чиқариши мумкин.

Қонунга асосан суд қароридан норози бўлган томон юқори инстанциядаги судга мурожаат қилиш учун ўн кун муддат берилган.

Қисқача айтганда, Ўзбекистонда ушбу муаммога нисбатан адолатли суд қарорига эришиш қийин масала. Шу сабабли Франциянинг Страсбург шаҳрида жойлашган Инсон ҳуқуқлари бўйича Европа судига шикоят аризасини ёзиб мурожаат қилиш керак бўлади.

7. ИНСОН ҲУҚУҚЛАРИ БЎЙИЧА ЕВРОПА СУДИГА ШИКОЯТ АРИЗАСИ

1. Халқаро суднинг ўзига яраша муҳим қонунлари ва нозик томонлари бор. Шу сабабли Инсон ҳуқуқлари бўйича Европа судига шикоят аризасини ёзишдан олдин ўша Европада яшаётган тажрибали адвокатни ёллаш ва у билан бирга ишлаш муҳимдир. Бундай адвокатни топиш учун халқаро тажрибага эга бўлган швейцариялик таниқли адвокат Grégoire Mangeat (Грегуар Манжа, 1971) билан маслаҳатлашишни тавсия қиламан. У кўп йиллардан бери ҳалол ва ўз имконияти доирасида профессор Гулнора Каримовани (1972) ҳимоя қилди ва ҳимояни давом эттирмоқда. У Ўзбекистондаги вазиятни яхши билади ва ўзига ўхшаш яхши адвокатни тавсия қилиши мумкин.

Швейцария суди томонидан Гулнора Каримовага адвокат этиб таниқли адвокат Грегуар Манжа (1971, Gregoire Mangeat) 2016 йилда тайинланди ([7]). У ўз адвокатлик фаолиятини жуда яхши олиб бормоқда. У ҳақдаги маълумотни унинг сайтидан келтирай. Инглиз тилидан ўзбек тилига мен ўгирдим.

“Грегуар Манжа MANGEAT (адвокатлик фирмаси) асосчиларидан бири ва Женева Адвокатлар Ассотсиясининг собиқ президенти (2016-2018 йиллар). У Legal 500 томонидан тавсия этилган ва Chambers and Partners томонидан адвокат сифатида тан олинган.

Унинг асосий амалиёт йўналишлари суд ишларини юритиш, арбитраж, шунингдек оқ ёқалилар жиноятлари ва тергови.

У Швейцария ва халқаро суд жараёнларида мижозларга ёрдам бериш ҳамда вакиллик қилиш, даъволарни ижро этиш ва ҳимоя қилиш ҳамда вақтинчалик чоралар кўриш (мулкни олиб қўйиш, тақиқлар олиш, оммавий ахборот воситаларида нашр қилишни тақиқлаш ва бошқалар) бўйича ихтисослашган.

У Европа жиноий ишлар бўйича адвокатлар ассотсиятсияси (ECBA) аъзоси ва Европа фирибгарлик муаммолари ва қонунларга риоя қилиш бўйича юристлар уюшмаси (ECFL) аъзоси.

У хизмат жиноятлари, экстрадиция, мерос ёки банкротлик ишларида дастлабки далилларни тўплаш, мижозларни ҳимоя қилиш бўйича тасдиқланган тажрибага эга. Шунингдек, у жисмоний ёки юридик шахсларни санкция рўйхатидан чиқариш, шунингдек, юридик ва маъмурий ёрдам (солиқ, жиноий ва молиявий масалалар) бўйича ихтисослашган ва бир қанча трансчегаравий ва кўп юрисдиксияли суд жараёнларида иштирок этган.

Грегуар Женева Адвокатлар Ассотсиятсиясининг (ODA) Инсон ҳуқуқлари бўйича комиссияси раиси бўлган. Mangeat Adtorneys at Law ни ташкил этишдан олдин Грегуар Женевадаги Eversheds ширкати ва ундан олдин Женевада MCP Avocats ҳамкори бўлган.

У Женева университетида (ECAV) 2011 йилдан бери суд-тиббиёт кўникмаларидан таълим беради.

Академик маълумоти / таълим
M.B.L.-HSG, Санкт-Галлен университети, Швейцария
Женева бар
II Ассас Париж университети
Фрибург университети, Швейцария

Тиллар
француз, инглиз, италян, немес

gregoire.mangeat@mangeat.ch

Tелефон: +41 22 319 22 00” [8]

2. Европада яшаётган тажрибали адвокатни ёллашни яқин кунларда амалга ошириш муҳимдир. Токи у Ўзбекистондаги суд жараёнларида ҳам қатнашсин. Шунда Инсон ҳуқуқлари бўйича Европа судига шикоят аризасини ёзиш осонлашади ва вақтдан ютиш имконияти пайдо бўлади.

3. Албатта, хориждан адвокат жалб қилиш ва халқаро суд билан боғлиқ каттагина валюта харажати талаб қилинади. Бу борада катта маблағ талаб қилинса, Шoҳжаҳoн ва Зoҳиршoҳ Жўраевлар молиявий ёрдам сўраб улуғ ҳофиз Шерали Жўраев шогирдларига, ва ҳатто қўшиқ мухлисларига мурожаат қилишлари мақсадга мувофиқдир. Ҳофиз Шерали Жўраев шаънини ҳимоя қилиш учун улардан кўпчилиги ўз имкониятлари доирасида молиявий ва бошқача ёрдам беришлари аниқ. Жумладан, мен ҳам имкониятим доирасида молиявий ёрдам беришга тайёрман, иншааллоҳ.

4. Европа судининг яхши томонларидан бири, шикоят аризасини қабул қилиб олгач Европа суди қарори чиққунига қадар Ўзбекистон суди қарори кучга кириши вақтинча тўхтатилади.

5. Агар Ўзбекистон судида хато қилингани аниқланиб, Ўзбекистон суди қарори бекор қилинса, Инсон ҳуқуқлари бўйича Европа суди жабрланувчи томон ҳисобланмиш Жўраевлар фойдасига минглаб доллар жарима тўлаш вазифасини Ўзбекистон ҳукумати бўйнига юклаши мумкин. Бундай халқаро суд ҳукми сабабли Ўзбекистон ҳукумати ушбу идораларда қаттиқ текшириш ўтказиши, юқори мансабли айбдор айбдорларни ишдан олиши, ҳатто қамаши мумкин...

6. Ҳар қандай мажорали муаммоларни суд орқали, ҳатто халқаро суд орқали тинч йўл билан ҳал қилишга ўрганмоғимиз керак. Жўраевлар ва Ботир Қодиров орасидаги жанжални Ўзбекистон суди ва халқаро суд ёрдамида қонуний йўллар билан тинч ҳал қилиниши халқимизнинг бугунги ва эртанги авлоди учун жуда ибратли иш бўлади, иншааллоҳ.

ФОЙДАЛАНИЛГАН АДАБИЁТЛАР

1. СЕВАРА ҲУСНИДДИНОВА, “Учта тирранча отасини булғаяпти”. Жўраевлар нега судлашяпти? - “Учта тирранча отасини булғаяпти”. Жўраевлар нега судлашяпти? | Qalampir.uz (www.qalampir.uz/news/uchta-tirrancha-otasini-bulgayapti-zhurayevlar-nega-sudlashyapti-100584 2024 йил 24 апрел).

2. Ботир Қодиров Шоҳжаҳон ва Зоҳиршоҳ Жўраевларни нима учун судга бергани маълум бўлди. - Ботир Қодиров Шоҳжаҳон ва Зоҳиршоҳ Жўраевларни нима учун судга бергани маълум бўлди — Дарё Янгиликлари (daryo.uz) (www.daryo.uz/k/2024/04/23/qoshimcha-dalillarni-olish-uchun-sud-yana-qoldirildi-botir-qodirov-shohjahon-jorayevni-nima-uchun-sudga-bergani-malum-boldi 2024 йил 23 апрел).

3. JO’RAEVLAR. Sherali Jo’rayev 20 yil oldin aytgan xaqiqatlari. - ❗️Sherali Jo’rayev 20 yil oldin aytgan xaqiqatlari (youtube.com) (www.youtube.com/watch?v=HWTiZN0jSo4 April 25, 2024. 2 daqiqa 48 soniyalik videolavha).

4. АБДУРАҲМОН ЭРГАШЕВ. Бу бола бизнинг уруғдан эмас – Шерали Жўраевнинг укаси. Интервью. – Бу бола бизнинг уруғдан эмас – Шерали Жўраевнинг укаси | Qalampir.uz (www.qalampir.uz/news/bu-bola-bizni-urugdan-emas-sherali-zhurayevning-ukasi-100608 2024 йил 25 апрел).

5. АҲМАДЖОНОВ Ш. Можарога доир видеони топайлик. Мурожаатим. - ШЕРАЛИ ЖЎРАЕВ | Записи в рубрике ШЕРАЛИ ЖЎРАЕВ | Дневник Турон_Шухратжони : LiveInternet - Российский Сервис Онлайн-Дневников (www.liveinternet.ru/users/4799013/rubric/6571781/ "Турон Шухратжони" кундалиги (дневник)даги “ШЕРАЛИ ЖЎРАЕВ”, “ПРАВОЗАЩИТА”, “2024 YILGI MAQOLALAR” рукнлари. 2024 йил 29 апрел);
- Facebook (www.facebook.com/profile.php?id=100002930964631 Шуҳратжон Аҳмаджоновнинг Фейсбукдаги саҳифаси, 2024 йил 29 апрел).

6. АҲМАДЖОНОВ Ш. Шерали Жўраев. Китобнинг тузатилган ва тўлдирилган 4-нашри. – https://www.liveinternet.ru/users/4799013/rubric/6956374/ (www.liveinternet.ru “Турон Шухратжони” кундалиги (дневник)даги “ШЕРАЛИ ЖЎРАЕВ КИТОБ” рукни, 2021.18.03-2023.19.09);
https://www.liveinternet.ru/users/4799013/ (www.liveinternet.ru “Турон Шухратжони” кундалиги (дневник), 2021.18.03-2023.19.09).

7. Каримова адвокати: Сўнгги суд ҳукми томонларнинг муросавий келишувга эришишини янада қийинлаштирди! – Каримова адвокати: Сўнгги суд ҳукми томонларнинг муросавий келишувга эришишини янада қийинлаштирди! (ozodlik.org) (www.ozodlik.org/a/gulnora-karimova-advokat-sud-hukmiga-munosabat-bildirdi/30499238.html 2020 йил 20 март).

8. Grégoire Mangeat (Грегуар Манжа). - Grégoire Mangeat | MANGEAT (www.mangeat.ch/attorneys/gregoire-mangeat/ ).

ДАВОМИ БОР