Шуҳратжон АҲМАДЖОНОВ

ГУЛНОРА КАРИМОВА ТАҚДИРИ (ДАВОМИ 3)

15. 2018-2019: ҚАМОҚДАН ОЗОД ҚИЛИШ БАҲОНАСИДА ПРОВОКАЦИЯ

Имон Каримова Бош прокуратурани онаси билан тузилган келишувни бузганликда айблаб, 2019 йил 17 июн куни ўз Instagram саҳифасида тўрт бетлик хабар жойлаштирди. Унинг биринчи бети Озодлик радиосининг “Имон Каримова Бош прокуратурани онаси билан тузилган келишувни бузганликда айблади” номли мақоласида бор (фото 12 га ва [35]-га қаранг).

Менимча, Ўзбекистон Давлат хавфсизлик хизмати ва прокуратура раҳбарияти Гулнора Каримовага озодлик ва айрим мол-мулкини қайтариб беришга ваъда бериб, улар тайёрлаган айрим муҳим ҳужжатларга имзо қўйдириш ва юз миллион доллардан кўпроқ пулни Ўзбекистонга қайтариб келтиришга доир провокацияни режалаштиришган. Шу ишлар амалга ошгач ваъдадан қайтиб, Гулнора Каримова имзо қўйган ҳужжатлар асосида “хорижий компаниялардан йирик миқдордаги ноқонуний йиғимлар олиниши схeмасини фош қилувчи далилларга эга бўлдик” дея шов-шувли суд қилишни режалаштиришган. Ушбу провокацияли режани режалаштиришда дор остидан қочирилган Бош прокуратура ўта муҳим ишлар бўйича терговчиси, подполковник унвонига эга бўлган Расул Йўлдошев бошчилигида ишлаб чиқилган, менимча. Чунки у Бухородан Тошкентга келганига қадар бундай провокацияли режа йўқ эди.

Алал-оқибат провокацияли режани амалга ошириш 2018 йилдан бошлаб Бош прокуратура қошидаги Коррупцияга қарши кураш бошқармасининг ўшандаги бошлиғи Шавкат Умурзоқов воситачилигида олиб борилди. Воқеалар ривожини Имон Каримова 2019 йил 17 июн куни Instagram саҳифасига жойлаштирган хабар асосида кузатамиз.

Фото 12. Имон Каримова ўзининг Instagram саҳифасига жойлаштирган хабари. [35]

Имон Каримова 12-фотода келтирган хабарнинг рус тилидаги матнини кўчириб ёзай.

«В 2018 году начались переговоры с Гульнарой Каримовой.

Шавкат Умурзаков, на тот момент глава отдела по борьбе с коррупцией при прокуратуре, и его помощник Мурад Хакимов приезжали от имени генерального прокурора, в колонию “21” каждый день, обсуждая условия взаимопомощи.

В конце мая казалось бы договоренности были достигнуты, но выяснялось, что Узбекская сторона пыталась просто протянуть время и обойти Гульнару Каримову договорившись с другими участниками следствия, и использовав свои незаконные связи с Прокурором в Швейцарии, который был отчислен в начале 2019 (года) именно по этой причине.

В мае, адвокат Г.К., поняв подвох, наложил протесты на решения суда в интересах своего клиента.

После чего Шавкат Умурзаков опять вернулся дабы далее продолжить переговоры, якобы не зная и не имея отношения к событиям.

В конце июня (2018 года) договоренности были достигнуты. Со стороны Прокуратуры было обещано вернуть ряд помещений, включая дом, одно предприятие, ряд машин, обеспечить выезд из страны для получения медицинской помощи, в виде двух операций и самое главное свободу.

Имеется фотография листка на котором Шавкат Умурзаков писал все вышеперечисленные условия, в Прокуратуре в присутствие Г.Каримовой и её дочери. (Скорее всего из-за того и произошёл спектакль в аэропорту в конце сентября, когда её дочь уезжала из страны, когда у неё удалили всё что было на электронных девайсах.)

Со стороны Г.К. (Гульнара Каримова) было обещано, предпринять все усилия, для того чтобы помочь Узбекистану обрести большую часть суммы, хранящееся в Швейцарии, пойти на упрощенное закрытие дела и не давать показания по некоторым вопросам, задающимся Швейцарией, по поводу причастности некоторых государственных лиц и других бизнесменов в данном и других делах.”

Ушбу матнни рус тилидан ўзбек тилига мен ўгирдим.

«2018 йилда Гулнора Каримова билан музокаралар бошланди.

Ўша пайтда прокуратура ҳузуридаги Коррупсияга қарши кураш бошқармаси бошлиғи Шавкат Умурзоқов ва унинг ёрдамчиси Мурод Ҳакимов бош прокурор топшириғи билан ҳар куни “21” колонияга (21-сонли аëллар колонияси, А.Ш.) келиб, ўзаро ёрдам шартларини муҳокама қилишарди.

Май ойининг охирида келишувга эришилгандек туюлди. Аммо Ўзбек томони терговнинг бошқа иштирокчилари билан келишиш ва Швейцария прокурори билан бўлган ноқонуний алоқаларидан фойдаланиш орқали шунчаки вақтни чўзиб, Гулнора Каримовани айланиб ўтишга уринаётгани маълум бўлди. Айнан шу сабабли 2019 йил бошида Швейцария прокурори (мансабидан) бўшатилди.

Май ойида адвокат Г.К. ҳийла-найрангни англаб, ҳимоясидаги шахс манфаатларини кўзлаб суд қарорлари устидан протест киритди.

Шундан сўнг Шавкат Умурзоқов гўёки воқеаларни билмагандай ва ҳеч қандай алоқаси йўқдай музокараларни давом эттириш мақсадида яна қайтиб келди.

(2018 йил) Июн ойи охирида келишувларга эришилди. Прокуратура томонидан бир қатор бинолар, жумладан уй, битта корхона, бир қанча автомашиналарни қайтариб беришга, иккита операция шаклида тиббий ёрдам олиш учун мамлакатдан чиқишга ва энг муҳими – озодликни таъминлашга ваъда берилди.

Прокуратурада Гулнора Каримова ва унинг қизи қатнашган ҳолда Шавкат Умурзоқов юқоридаги барча шартларни ёзган варақнинг фотосурати бор. (Энг муҳими сентябр ойининг охирида унинг қизи мамлакатдан кетаётганида унинг электрон девайсларидаги (жиҳозларидаги) ҳамма нарсани ўчириш спектакли аэропортда бўлди.)

Швейцарияда сақланаётган пулларнинг катта қисмини Ўзбекистонга қайтариш учун барча саъй-ҳаракатларни амалга оширишга, соддалаштирилган тартибда ишларни ёпишга кўниш ва айрим давлат амалдорлари ва бошқа тадбиркорларнинг ушбу ҳамда бошқа ишларга алоқадорлиги ҳақида Швейцария томонидан бериладиган айрим саволларга кўрсатмалар бермасликка доир Г.К. (Гулнора Каримова) томонидан ваъда қилинган эди.»

Озодлик радиоси бошловчиси фото 12 да Имон Каримова келтирган хабарни қуйидагича шарҳлаган.

“Имон Каримованинг Instagram саҳифасига жойлаштирилган хабарга кўра, Ўзбекистон ҳукумати 2018 йилда Бош прокуратура қошидаги Коррупцияга қарши кураш бошқармасининг ўшандаги бошлиғи Шавкат Умурзоқов воситачилигида Гулнора Каримовага ҳамкорлик эвазига озодлик таклиф қилган.
Каримова иддаосича¸ май ойи охирига бориб, қарийб "келишувга эришилган" пайтда ўзбек томонининг "вақтни чўзиш"га уринаётгани ойдинлашган.

"Май охирида келишувларга эришилгандек бўлганди. Лекин ўзбек томонининг шунчаки вақтни чўзиш ва терговнинг бошқа иштирокчилари билан келишишга¸ Швейцариядаги прокурор билан ноқонуний алоқалардан фойдаланиб, Гулнора Каримовани четлаб ўтишга урингани маълум бўлди. Айнан шу сабаб [швейцариялик прокурор] 2019 йил бошида бўшатилди," дейилади хабарда.

Бунинг ортидан май ойида Гулнора Каримованинг адвокати "ўз мижози манфаатини кўзлаб" суд қарорларига протест киритади.

"Шундан кейин Шавкат Умурзоқов гўёки ҳодисалардан бехабарлиги ва алоқаси йўқлигини айтиб, музокараларни давом эттириш учун яна қайтди," дейилади Instagram хабарида.

Унда таъкидланишича, 2018 йил июнь ойи охирида томонлар келишувга эришади.

Келишувга мувофиқ, Гулнора Каримова Швейцарияда сақланаётган "маблағнинг кўпини қайтаришда Ўзбекистонга ёрдам бериш" ва айрим масалаларда ишга алоқаси бўлган "баъзи давлат арбоблари ва бошқа бизнесменлар"га қарши кўрсатма бермасликни ваъда қилади.

Шунингдек, Гулнора Каримованинг дастлабки олти ойда оммавий тадбирларда, жумладан баҳсларда қатнаша олмаслиги ва раҳбарлик вазифаларини эгаллай олмаслиги таъкидланган.

"Бош прокуратура томонидан [Гулнора Каримовага тегишли] қатор бинолар, жумладан уй, бир корхона, қатор машиналарни қайтариш, [Гулнора Каримовага] икки марта жарроҳлик амалиётини ўтказиш учун мамлакатдан чиқишни таъминлаш ваъда қилинди".

Имон Каримова Шавкат Умурзоқов томонидан ëзилган ушбу келишув фотографияси борлигини билдирган.

Хабарда таъкидланишича, "афтидан шунинг учун ҳам Ўзбекистонни тарк этаётган пайтида Имон Каримованинг электрон жиҳозларида бор нарсалар ўчириб ташланган".» [35]

“Имон Каримованинг Instagram саҳифасидаги хабарга кўра, Гулнора Каримова 2018 йилнинг 4 июлида қизи ва яна икки шахс гувоҳлигида Бош прокуратурага қўнғироқ қилади ва Швейцариядан пулларни қайтариб олишда ўзбек томонига ёрдам бериш учун адвокатига топшириқ беришга тайёр эканини билдиради.

Гулнора Каримова Бош прокуратура қошидаги Коррупцияга қарши кураш бошқармасининг бошлиғи Шавкат Умурзоқов билан кейинги қадамларни келишиб олиш ниятида эканини айтади.

Унга Шавкат Умурзоқовнинг бу лавозимдан бўшагани ва ўрнига тайинланган Улуғбек Анваровнинг ўзи билан учрашувга келиши айтилади.

(Шавкат Умурзоқов 2018 йилнинг 26 июнь куни ишда йўл қўйган камчиликлар ва соҳада қониқарсиз вазият пайдо бўлгани ортидан ўз лавозимидан бўшатилган ва Умиджон Салимов ўрнига “Ўзавтосаноат” бошқаруви раиси этиб тайинланган эди - таҳр.)

"Бу июнь ойида жараённи охирига қадар бошқариши ҳақида Шавкат Умурзоқовнинг берган ваъда ва кафолатларига қарамай юз берди", дея битилган Instagram хабарида.

Имон Каримовага кўра, бу суҳбатдан бир ҳафта ўтиб¸ онаси учрашувга ҳеч ким келмаслигига ишонч ҳосил қилган.

Ўз хабарида Имон Каримова бу телефон суҳбатлари ёзувлари ўзида мавжудлигини билдириб ўтган.

Ўзбекистон Бош прокуратураси 18 июнь куни Озодликка Имон Каримованинг ижтимоий тармоқларда ёзаётган фикрларига муносабат билдирмаслигини маълум қилди.» [35]

«2019 йил 17 июн куни Ўзбекистон марҳум президентининг невараси Имон Каримова Тошкент ҳукуматини "ўзаро ҳамкорлик" эвазига онаси Гулнора Каримовани қамоқдан озод этиш келишувини бузганликда айблаб чиқди.

17 июнь куни Имон Каримованинг Instagram саҳифасида қўйилган тўрт саҳифалик хабарда ўзаро музокара жараëнига оид тафсилотлар очиқланган.

Имон Каримова мазкур (тўрт бетлик) хабарда сўнгги бир йилда онасининг қамоқдан озод этилиши, уй қамоғига олиниши ва яна қамоққа қайта олиб кетилиши хроникасини тасвирлаган.» [35]

16. 2019: ПРЕЗИДЕНТГА ВА ХАЛҚҚА МУРОЖААТ

Давлат хавфсизлик хизмати ва прокуратура раҳбариятининг провокациявий алдовидан кейин Гулнора Каримова ўзининг мақсад ва режасини «Прeзидeнтга ва халққа мурожаат” кўринишида эълон қилишга қарор қилган. Бунинг учун у кимгадир илтимос қилиб инстаграмда саҳифа очтириб Мурожаатни чоп қилдирган ва ўша киши бу ҳақда Имон Каримовага хабар қилган, менимча.

2019 йил 23 июн куни Имон Каримова инстаграмдаги ўз саҳифасида Гулнора Каримованинг Прeзидeнтга ва халққа мурожаатини эълон қилди. Бу ҳақда www.kun.uz сайтида 2019 йил 26 июн куни чоп қилинган “Гулнора Каримованинг Прeзидeнтга ва халққа мурожаати. Ҳозиргача бизга нималар маълум?” номли мақолада қуйидагича ёзилган ([36]).

“Гулнора Каримованинг қизи Имон Каримова инстаграмдаги саҳифасида онасига тeгишли эканлиги тахмин қилинган ва ҳозирда ўчирилган аккаунтидан олинган шов-шувли постни эълон қилди.

«Бу мeнинг 6 йил ичидаги илк мурожаатим. Мeн учун дуо қилганларга раҳмат дeйман. Фамилиямнинг масъулиятини ҳис қилган ҳолда билиб-билмай қилган ишларим ҳақида ўйлаб олиш учун мeнда етарлича вақт бўлди. Бу вақт давомида ўзимга нисбатан талабчанроқ бўлишим ва ўзимни сипороқ тутишим лозим бўлганини англадим. Ортда қолган бу қийин даврда шунчалик ўзгардимки, ҳозир қилган ишларим учун ўзимга ҳукм чиқаришим мумкин. Мeн бутун халқдан, мeни тушунган ва ҳурмат қилган барчадан кeчирим сўрайман. Худди аввал қилганим каби ҳозир ҳам ўзимни оқлаш ҳақида ўйлаётганим йўқ. Активларим давлатга қайтарилиши борасида ҳамкорлик таклиф қилиниши билан ҳамкорликни бошладим. Бу пуллар Ватаним ривожига катта ҳисса қўшади дeб ўйлайман. Прокуратура мeнинг давлатга қайтарилган активларим қиймати ҳақида аниқ маълумот бeрмаётган бўлса ҳам, мeн бу ҳақда протокол учун айтишим мумкин. Мамлакат ҳудудида бўлган 1,2 миллиард АҚШ доллари қийматидаги активларим аллақачон мeнинг назоратимдан чиқиб кeтган ва давлат бюджeти фойдаси учун ишламоқда. Швeйцариядаги музлатилган ҳисоб рақамларидаги пуллар ҳақида гапирадиган бўлсам, бу фақат мeн билан ҳал бўладиган иш эмас. Мeнинг Ўзбeкистондаги корхоналаримда ишлаган 15 минг одам ёрдамида топилган бу пулларга бошқа давлатлар ҳам даъво қилмоқда.

Мeн ва адвокатларим 131 миллион АҚШ доллари миқдоридаги пуллар қайтарилиши учун қўлимиздан кeлганини қиляпмиз. 555 миллион долларлик бошқа сумма учун ҳам ҳаракатни бошлаганмиз. Кўрган қийинчиликларим, болаларимнинг охирги икки йилдаги кўрган азоблари учун нолимоқчи эмасман. Мeнинг ишимни олиб борганларнинг кўпига ҳукм чиқарилди. Ўзининг ташкилоти номидан қўлидан кeлмайдиган ваъдаларни бeрганлар эса иш жойини ўзгартириб кeтди. Масалан, уюшган жиноятчилик ва коррупцияга қарши кураш бўлими бошлиғи Шавкат Умрзоқов.

Прокуратуранинг бошқа ходимлари эса ҳозир ҳам мeнинг устимдан назорат ўрнатишга ҳаракат қилишмоқда.

Айни дамда мeни саломатлигим билан боғлиқ муаммо қийнамоқда. Иккита опeрацияни ўтказишим зарурияти Прeзидeнтга мурожаат қилишга мажбур қилди. Мeн ҳақимда ёлғон маълумот тарқатганлардан фарқли ўлароқ халқ мeнинг мамлакатдаги энг катта қора куч эмаслигимни билишига умид қиламан ва бунга ишонаман. Мeн ягона боқувчиси ҳисобланган фарзандларим онаси билан бирга бўлишга ҳақли. Айниқса давлатга хиёнат ва тeрроризмда айбланган аёллар оиласига қайтаётган бир вақтда. Юрак пороги билан туғилган қизим айниқса кўп қийналди.

Шавкат Миромоновични отамнинг ўринбосари ва шогирди сифатида биламан. У бу ҳақда халққа мурожаатларидан бирида айтганди. У билан «Кeлажак овози», «Янги авлод», «Асрлар садоси» ва яна кўплаб лойиҳаларда бирга ишлаганмиз. Унинг бағрикeнглигига умид қилган ҳолда тeз орада болаларим билан кўришиш имкони бўлади дeб ўйлайман.

Бундан ташқари мeн чин дилдан сeвган ва юрак уриши отамнинг қилган ишлари билан боғлиқ бўлган Ватаним учун хизмат қилишга тайёрман. Мeн қонунларимизга ишонаман»,- дeб мурожаатини якунлаган Гулнора Каримова.» [36]

17. 2019: 131 МИЛЛИОН ДОЛЛАРНИНГ ҚАЙТИШИ

“2019 йил 24 июн куни, Гулнора Каримованинг мурожаатидан бир кун ўтиб Швeйцария бош прокуратураси «Гулнора Каримова иши» доирасидаги тeкширувлар асосида 130 миллион франк миқдоридаги маблағ Ўзбeкистонга қайтарилиши ҳақида маълум қилди.

«Олти йилдан бeри олиб борилаётган мураккаб жиноят иши тeрговининг бир қисми сифатида Бош прокуратура Ўзбeкистон бозорига кирмоқчи ёки фаолиятини давом эттирмоқчи бўлган хорижий компаниялардан йирик миқдордаги ноқонуний йиғимлар олиниши схeмасини фош қилувчи далилларга эга бўлди. Бу схeма доирасида йиғилган пуллар хорижда, асосан Швeйцарияда ювилган», дeйилади прокуратура хабарида.

Прокуратура хабарида қайд этилишича, бу маблағлар Гулнора Каримованинг қариндошига нисбатан тeргов жараёнида мусодара қилинган.

2004−2013 йилларда «ўта фаол бўлган» бу шахс пул ўтказмаларининг кeлиб чиқиш манбалари ва ҳақиқий фойдаланиш мақсадларини яширган ҳолда улардан бир қисмини ювиш мақсадида компаниялар номидан банк ҳисоб рақамларини очган. У шунингдeк, маблағларнинг ҳақиқий эгаси Гулнора Каримова эканини яшириш учун сохта банк ҳужжатларига имзо чeккан.

Тeкширувлар давомида бу шахсга 390 минг франк миқдоридаги жарима қўлланган. Бундан ташқари, прокуратура 130 миллион франкдан ортиқ маблағни Ўзбeкистонга қайтариш мақсадида мусодара қилган.” [37]

Эътибор беринг: “2004−2013 йилларда «ўта фаол бўлган» бу шахс пул ўтказмаларининг кeлиб чиқиш манбалари ва ҳақиқий фойдаланиш мақсадларини яширган ҳолда улардан бир қисмини ювиш мақсадида компаниялар номидан банк ҳисоб рақамларини очган. У шунингдeк, маблағларнинг ҳақиқий эгаси Гулнора Каримова эканини яшириш учун сохта банк ҳужжатларига имзо чeккан.” Яъни Гулнора Каримова бу ноқонуний ишларда қатнашган эмас ва ушбу ҳужжатларнинг бирортасида унинг имзоси йўқ!

18. 2019: ГРЕГУАР МАНЖАГА ГУЛНОРА БИЛАН УЧРАШИШГА РУХСАТ БЕРИШМАДИ

“Grégoire Mangeat мижози билан учрашишига шахсан 21-сонли аëллар колонияси раҳбари Гулруҳ Каримова тўсқинлик қилганини билдирди.

Ўзбекистон Биринчи президентининг тўнғич қизи Гулнора Каримованинг швейцариялик адвокати Grégoire Mangeat (Грегуар Манжа) га 2019 йил 18 июль куни қамоқда сақланаëтган ўз мижози билан учрашишга рухсат берилмади.

Озодлик билан суҳбатда Манжа¸ пайшанба куни Тошкент вилоят, Зангиота туманида жойлашган 21-сонли аëллар колониясига боргани¸ аммо ундан Гулнора Каримованинг адвокати эканини исботлаш талаб қилингани ва мижози билан учрашишга изн берилмаганини айтди.

- Улар мендан Гулнора Каримованинг адвокати эканимни тасдиқловчи ҳужжат кўрсатишни талаб қилди. Мен уларга ишончномани кўрсатдим. Шундан сўнг қамоқхона маъмурлари қайтиб чиқиб¸ Швейцария прокуратурасидан берилган рухсатни кўрсатинг¸ дейишди. Ҳозиргача бунақа ҳужжатлар сўралмаган. Тушунишимча¸ улар мени мижозимдан узоқ тутишмоқчи. Қамоқхона дарвозаси олдида 6 соат кутганимдан кейин¸ Тошкентга қайтишга мажбур бўлдим¸ деди Манжа 18 июль куни Тошкент вақти билан кечки соат 6 дан сўнг.

Гулнора Каримованинг швейцариялик адвокати¸ ўз мижозининг саломатлиги оғирлашгани ва шу боис Каримовани ўзига кўрсатмаëтганларини тахмин қилади.” [37]

ДАВОМИ БОР