Шуҳратжон АҲМАДЖОНОВ

МАЛОҲАТГА ЖАВОБИМ

We are judged by what we finish, not on what we start. [1, p.100]
ENGLISH WORDS OF WISDOM

Биз ҳақимизда бошлашимизга эмас маррага етишимизга қараб хулоса чиқаришади. [1, 100-бет]
ИНГЛИЗ ХАЛҚ ҲИКМАТИ


КИРИШ СЎЗИ

Маълумки, таниқли журналист Малоҳат Эшонқулова 2014 йил 3 ноябр куни Ўзбекистон Республикаси бош прокурори Рашиджон Қодиров ва Ўзбекистон Республикаси Миллий хавфсизлик хизмати (МХХ) раиси Рустам Иноятовга Талабнома жўнатди. У Талабнома охирида бундай ёзган:

«Ушбу талабномани ёзишдан муддаом, сайловлар олди ва умуман, президент сайлови арафасида Ислом Абдуғаниевич Каримов, унинг оиласи ва катта қизи Гулнора Исломовна билан боғлиқ барча “деди-деди”, “миш-миш” ва турли ғийбатларга тамомила барҳам бериш ва чек қўйиш мақсадида мен мустақил ЖУРНАЛИСТ СИФАТИДА ЎЗБЕКИСТОНДА, УЙ ҚАМОҒИДА САҚЛАНАЁТГАН ГУЛНОРА КАРИМОВА БИЛАН УЧРАШИШ ВА УНИНГ АЙНИ ДАМДАГИ АҲВОЛИ ХУСУСИДА ОММАГА ОЧИҚЛАШ ИСТАГИДАМАН.

Шу сабабли, менга президент қизи Гулнора Каримова билан учрашишга ва ундан интервью олишга рухсат беришларингизни, ўз касбий фаолиятимни амалга оширишимда монелик қилмасдан, аксинча, Журналистлик фаолияти тўғрисидаги мамлакат қонунлари талабларига мувофиқ мустақиллик ва эркинлигимни таъминлаб беришларингизни талаб қиламан» [2]

Малоҳат Эшонқулованинг Талабномаси ҳақида www.uznews.net/uz/ сайтида 2014 йил 3 ноябр куни [3]-мақолани ўзбек ва рус тилларида чоп этди. Мен www.uznews.net/uz/ ва www.facebook.com сайтларидаги ушбу мақолалар остига ўзбек ва рус тилларида қуйидаги фикримни ёздим.

“Офарин, Малоҳат! Бу жуда муҳим интервью бўлади. Гулнора Каримовадан интервью олиш ҳақидаги аризангиз орқали сиз Ўзбекистондаги қонли режимнинг жуда нозик ва оғриқли жойидан ушладингиз. Ушбу интервью МХХ ходимларининг Гулнорага қарши қўллаётган қонунсизликларни фош этади ва жасур Гулнорага қарши МХХнинг кўпгина режаларини барбод этади. Сизга муваффақиятлар тилайман!” [3]

Бу фикримга Малоҳат 2014 йил 6 ноябр куни www.facebook.com сайтидаги ўз саҳифасида қуйидаги жавоб хатини ёзибди ва унга www.uzxalqharakati.com сайтида 2014 йил 9 октябр куни чоп этилган [5]-мақолани илова қилибди.

“Шухратжон Ахмаджонов, менинг Гулнора билан учрашиш борасидаги "Талабномамам" остига "... жасур Гулнорага қарши МХХнинг кўпгина режаларини барбод этади" дея изоҳ қолдирган экансиз.... Шуҳратжон ака, . "... Сизга муваффақиятлар тилайман!" деганингиздан хурсандман, бироқ, минг афсуски, "... жасур Гулнора..." деган иддаоларингизга мутлақо қўшила олмайман. Негаки, сизни билмадиму, ҳали мен Г. Каримованинг сиз ҳис қилган ЖАСУРЛИГИни кўрган эмасман.... Кейин... Қараб турсам, менинг Гулнора масаласидаги фикрларим сизнинг хон қизи ҳақидаги тўхтамларингизга мутлақо тўғри келмайдиган кўринади. Аксинча. мутлақо қарама-қарши. На чора, Г. Каримова хусусида ижобий ва ё салбий хулосага келиш, бу сизнинг ҳуқуқингиз. Албатта мен каби ўйлашингиз, сўйлашингиз шарт эмас... Фикрлар ранг-баранг бўлиши табиий.... Гулнора Каримовага ҳайриҳоҳ бўлганингиз учун ёқангизга ёпишмоқчи эмасман... Шусиз ҳам низолардан чарчаб кетганман... Фақат... Айтмоқчи бўлганим, Гулнора билан учрашув сўрашимдан, интервью олишни исташимдан кўзлаган ўзга мақсадларим бор.... Шуни айтмоқчи эдим...» [4]

Менинг юқорида келтирилган тилакларим ортида мухолифат кураши, тинч йўллар билан Ўзбекистондаги қонли диктаторлик режимини демократик тузумга ўзгартириш ва шунга ўхшаш масалалар ҳамда муаммолар турганлиги боис Малоҳат Эшонқулованинг ушбу фикрига сал батафсилроқ жавоб беришга қарор килдим.

Ушбу мақолам билан Малоҳатнинг ёки бошқа ўқувчиларнинг фикрини ўзгартирмоқчи эмасман. Мен фақат ушбу долзарб масалада ўз фикрларимни баён қилмоқдаман, холос.


1. БИРИНЧИ ЖАВОБИМ

Аввал [4]-мақолада келтирилган Малоҳат хатининг биринчи қисмига жавоб берсам.

“Шухратжон Ахмаджонов, менинг Гулнора билан учрашиш борасидаги "Талабномамам" остига "... жасур Гулнорага қарши МХХнинг кўпгина режаларини барбод этади" дея изоҳ қолдирган экансиз.... Шуҳратжон ака, . "... Сизга муваффақиятлар тилайман!" деганингиздан хурсандман, бироқ, минг афсуски, "... жасур Гулнора..." деган иддаоларингизга мутлақо қўшила олмайман. Негаки, сизни билмадиму, ҳали мен Г. Каримованинг сиз ҳис қилган ЖАСУРЛИГИни кўрган эмасман....» [4]

Биринчидан, Гулнора Каримова аёл боши билан эуда кўп савоб ишларни ташкиллаштира билди ва қила олди. Бу ҳақда у Швейцариянинг Bilan журналига 2013 йил март ойида берган интервьюсида қуйидагича айтган ва ёзганди.

“2004 йилда ташкил этилган ҳамда UNESCO билан ҳамкорлик тўғрисидаги келишувга эга Фонд Форум (7 миллиондан ортиқ бенефициарлар, менинг асосий ҳар йили ўтказиладиган лойиҳаларимдан – «Янги авлод» республика болалар ижодиёти фестивали (2004 йилдан буён – бутун Ўзбекистондан 130 мингдан ортиқ истеъдод эгаси), «Келажак овози» республика иқтидорли ёшлар танлови (2005 йилдан буён бутун Ўзбекистон бўйлаб 400 мингдан ортиқ иштирокчи), UNESCO билан ҳамкорликдаги «Асрлар садоси» анъанавий маданият фестивали, ҳар йили 100 000 киши ташриф буюрувчи Art Week Style.uz санъат ҳафталиги, «Навқирон Ўзбекистон» анъанавий санъат фестивали ва кўплаб бошқа лойиҳалар); «Меҳр нури» хайрия жамғармаси (800 мингга яқин бенефициар), «Аёллар кенгаши» республика жамоат бирлашмаси (750 минга яқин бенефициар), «Ҳаёт учун!» кўкрак бези саратони миллий уюшмаси (127 800га яқин бенефициар – ҳар йили ўтказиладиган йирик лойиҳалардан бири АҚШнинг Susan G.Komen фонди билан ҳамкорликда ўтказиладиган «Ҳаёт учун!» форум-марафони (3 йил мобайнида бутун Ўзбекистон бўйлаб 100 мингдан ортиқ киши лойиҳада иштирок этди), кўкрак бези саратонини профилактика қилиш мақсадида бутун Ўзбекистон бўйлаб 27 минг аёл бепул тиббий текширувдан ўтказилган; Ижтимоий ташаббусларни қўллаб-қувватлаш фонди (2,5 млн.дан ортиқ бенефициар, йирик лойиҳалар орасида Давлат таълим тизими учун «Инклюзив таълим» дастури (600дан ортиқ имконияти чекланган болалар учун) ва «Тоза сув» (Оролбўйи экологик ноқулай ҳудуди аҳолисини ичимлик суви билан таъминлаш); «Келажак овози» ёшлар ташаббуслар маркази (500 мингдан ортиқ иштирокчи), «MEROS» Ўзбекистон антикварлари уюшмаси, «IJOD» Ўзбекистон рассомлари, санъатшунослари ва халқ усталари уюшмаси (300 дан ортиқ ҳунармандларни бирлаштиради ва йилига икки маротаба “Базар-Арт” лойиҳасини ўтказади); Абу Али Ибн Сино (Авиценна) номидаги халқаро халқ табобати уюшмаси; Ўзбекистон ижтимоий масъулиятли фуқаролари форуми; Сиёсий тадқиқотлар маркази, бутун Ўзбекистон бўйлаб болалар спорти ва ижодиёти марказлари ва бошқалар» [6]

Таниқли журналист ва мухолифат фаоли Юсуф Расул бу интервьюнинг тўлиқ матнини “Мана буни жасорат деса бўлади!» деган ном остида 2013 йил 12 март куни www.yangidunyo.org сайтида чоп этганди ([6]-га қаранг).

Иккинчидан, Гулнора Каримова 2013 йил декабрида Британияда чиқадиган Telegraph газетаси саволларига электрон почта орқали жавоб қайтариб, жуда қудратли шахслар бўлмиш МХХ раиси Рустам Иноятов (22.06.1944) ва унинг ўринбосари Ҳаëт Шарифхўжаевни фактлар асосида қаттиқ танқид қила олди ва улар жиноятини фош этди ([7]-га қаранг).

“Ўз атрофидагиларга қарши қўрқитиш кампанияси ҳақида ҳикоя қила туриб¸ Гулнора Каримова Ўзбекистон прокуратураси ва МХХдаги конкрет шахсларни тилга олади ва улар назоратидаги "бизнес империяси"ни фош этади (иқтибос бошланади):

“Бизники каби ишлар устидан “тергов” деб аталадиган жараëн яна одатга кўра Иноятов оиласига яқин¸ “ишончли” одам Мирағлам Мирзаев орқали амалга оширилди. Бу одам Иноятов опасининг эрига ини бўлади ва Тошкент шаҳар прокурорининг ўринбосари сифатида асосан “коррупция ва иқтисодий жиноятлар”га оид ишлар билан шуғулланади. Унинг бундай жиноятлар юзасидан чиқарадиган қарорлари¸ гувоҳларга кўра¸ 500 мингдан 1 миллион АҚШ долларигача боради. Мирзаев бу системада 18 йилдан бери ишлайди ва Прокуратура идорасидаги ҳамма нарсани¸ аслида айнан шу одам назорат қилади. Унинг ўғли Рашид¸ айнан шундай МХХнинг Тошкент идорасини назорат қилади. Рашид МТС нинг қочиб кетган директори¸ айрим гуруҳлар қўллови билан мен ҳақимдаги энг куракда турмас айбловлар эълон қилган Беҳзод Аҳмедовнинг яқин дўстидир.

Мен ҳақимдаги турли-туман ҳикояларга қарамай¸ Tammaron Ltd. нинг МТС учун 20 миллион АҚШ долларига LTE лицензияси олиб бериш каби жуда конкрет келишувлар ҳамон қулфу калит остида қолмоқда. Ғалати жойи шундаки¸ ўнга яқин одам орасида Аҳмедов ҳам Ўзбекистон Миллий хавфсизлик хизмати томонидан¸ унинг ҳар бир қадамини менга боғлаш мақсадида уюштирилган PR кампаниясининг нишонига айланди.

Ширкат Россия-Ўзбекистон хавфсизлик хизматлари ҳамкорлигида Афғонистон йўналишида ташкил этилди ва Россия томондан унга МТС ишга ëллаган Калганов бошчилик қилди.

Бу ширкат устидан тергов бошланган бир пайтда Аҳмедовнинг қўлида паспорти бўлмаган ҳолда¸ чегарадан қандай ғойиб бўлиши жуда қизиқдир. Тошкентдан кетиши билан Аҳмедов Парижда Тиллаев билан учрашди ва унга нақд пулни мамлакатдан олиб чиқиш учун тузилган Lapescara Balamore, Haytkon Servis ‘Plyus’, Asia Agro Food Export, Agro Time Group, Pocati Gordon Qurilish, Abdujafar Savdo, West Elektrik Group, Abdujafar Savdo Plus, Elektro Jixoz Nur Savdo, Exad Lancer, Sir Nosir, Zolotoy Modern Service каби ширкатлар рўйхатини берди.

Матбуотдаги чиқишлар ва алоҳида ўрганилган ишлар бу ширкатларнинг МХХ раиси ўринбосари Ҳаëт Шарифхўжаев назоратида эканини кўрсатади. Айни пайтда¸ улар тақдим этаëтган ҳикояларда мени дунë бўйлаб МТС капиталининг эгаси сифатида кўрсатишмоқда. Жуда кулгули...

МХХ қўшма “бизнес”ининг аксар қисми ўзбек иқтисодининг йирик соҳаларини (75% давлатга қарашли соҳалар; қурилиш жабҳасидаги давлат тендерлари; транзит ва савдо) шунчаки рэкет қилиш қўли билан қўлга киритилган. Бу бизнес Аҳмедовнинг яқин дўсти Отабек Ғозиев (Ғозиев Салимов¸ Мирзиëев ва Алишер Усмонов кланининг қариндоши ва асосий одамидир)¸ унинг 22 йиллик дўсти Ҳаëт Шарифхўжаев¸ унинг укаси Жавдат Шарифхўжаев (тақдир ҳазили билан Жавдат МХХ нинг Коррупция ва иқтисодий жиноятларга қарши кураш бошқармаси бошлиғи эди ва ҳозирда терроризмга қарши кураш бошқармасига ўтказилди) ва бу одамларга жуда садоқатли бўлган бошқалар томонидан назорат қилинади.

Бу одамлар шунингдек транзит ва пахта соҳасида ҳам қўшма бизнесга эга ва Silk Road, Korbit, Orient Finance Center каби пул ювишга ихтисослашган аксар ширкатларни ҳам улар назорат қилади. Улар бу ишни 30 миллионлик мамлакатдаги биргина банк - Azia Alliance Bank орқали амалга оширадилар.

Бу молиявий тизим асосчи ва хўжайинлари МХХ га алоқадор қуйидаги ширкатлардир: Gorefield International (айланмаси 10 миллион), Unix Logistic (5 миллион), Jeff Investment (4 миллион), ва Савинков (6.5 million) ҳамда Овик Мкртчан (6 million) каби хусусий шахслардир.

“Мега Планет” савдо мажмуасини назорат қилаëтган Мкртчан Москвада ўлдирилган МДҲ жиноий авторитетлари отаси “Дед Хасан”нинг жиянидир. Ана шундай бўм-бўш “Мега Планет”лардан бири яқинда Тошкентнинг Эски шаҳарида очилди. Бундай инфратузилмалар МХХ даги айни гуруҳга қарашли яна бир банк - “Orient Finance” га пул ювиш учун чексиз имкон яратиб бермоқда. Тепада номлари келтирилган ширкатлар Rietumu Bank, Commerc Bank, and Raiffeisen Bankда очилган ҳисоб рақамлари орқали иш кўрмоқда.

Айни гуруҳ назоратида кўчмас мулк соҳасидаги каттагина акциялар ҳам бор ва бунинг орқасида Латвиядаги юқори даражали МХХ расмийлари турибди. Латвиялик шериклар билан бирга бошқариладиган Synecta (асли Словакияда) ширкати баробарида улар Ўзбекистон ëнилғи секторидаги энг йирик давлат тендерларига ҳам аралашган. Zerkrasta меҳмонхонаси ва Латвиядаги Суниши кўли бўйидаги виллалар ҳам МХХ даги юқори даражали расмийлар ва улар одамларидан иборат айни гуруҳ номига расмийлаштирилган ва Шарифхўжаев оиласи назоратидадир. Бу кўчмас мулкларнинг асосий эгаси Иноятов оиласининг ишончли вакили¸ шунингдек Латвиядаги банк ҳисоблари эгаси Керимов Тимур Сапариетовичдир. (иқтибос тугади)» [7]

Ўзбекистонда жуда қудратли МХХ раиси ва ўринбосари ҳақида бундай танқидий гапларни мақола қилиб ёзиш ҳамда дунёда машҳур бўлган газетада чоп эттириш учун ЖАСУР бўлмоқ керак. Гулнора Каримова ҳақиқатдан ҳам ўзбек халқининг ЖАСУР аёлидир.


2. ИККИНЧИ ЖАВОБИМ

Энди [4]-мақолада келтирилган Малоҳат хатининг иккинчи қисмига жавоб берсам.

«Кейин...Қараб турсам, менинг Гулнора масаласидаги фикрларим сизнинг хон қизи ҳақидаги тўхтамларингизга мутлақо тўғри келмайдиган кўринади. Аксинча. мутлақо қарама-қарши. На чора, Г. Каримова хусусида ижобий ва ё салбий хулосага келиш, бу сизнинг ҳуқуқингиз. Албатта мен каби ўйлашингиз, сўйлашингиз шарт эмас... Фикрлар ранг-баранг бўлиши табиий.... Гулнора Каримовага ҳайриҳоҳ бўлганингиз учун ёқангизга ёпишмоқчи эмасман... Шусиз ҳам низолардан чарчаб кетганман... Фақат... Айтмоқчи бўлганим, Гулнора билан учрашув сўрашимдан, интервью олишни исташимдан кўзлаган ўзга мақсадларим бор.... Шуни айтмоқчи эдим...» [4]

Малоҳат, сиз “Айтмоқчи бўлганим, Гулнора билан учрашув сўрашимдан, интервью олишни исташимдан кўзлаган ўзга мақсадларим бор....» деб ёзиб [5]-мақолани илова сифатида келтиргансиз. Шу мақолангизда келтирилган айрим гапларингизга озроқ эътироз билдирсам.

Биринчидан, Гулнора Каримова хон қизи эмас, балки диктатор президент Ислом Каримовнинг қизи деб ёзсак тўғрироқ бўлади.

Иккинчидан, уй қамоғида бўлган Гулнора Каримованинг куч ишлатар тизимлари билан тўқнашувига оид фотосуратлар масаласида. Мен 50 йилдан бери сураткашлик билан шуғулланган ва техника соҳасида Москвадаги Бауман номли Техника университетида 4 йил ўқиб, етук муҳандис-конструктор лавозимигача ишлаган мутахассис сифатида айтишим мумкин: бундай сифатли суратларни мобил телефонда ҳам олиб ишлаш мумкин. Суратларни Гулноранинг қизи Иймон олган бўлиш эҳтимоли катта ва шу сабабли у кадрларда йўқ. Қўриқчилар ҳамма эътииборини Гулнорага қаратган пайтда мобил телефонда олиш имконияти бўлган.

Учинчидан, сизнинг “Ўзбекистон МХХси бу суратларни қандай йўл билан бўлмасин, тўхтатиб қолишга қодир эди! “Хўш, нега шундай қилмади?” деган саволнинг жавоби кимни қизиқтиради?» деган саволингизга жавоб берай. Мобил телефонингиз хотираси бўлмиш хотира (сим) картасининг нақадар кичик ўлчамларига эътибор беринг. Агар шу сим карточкани бирор киши камзули астарига ёки сочи орасига қўйиб олиб чиқса ходимлар топа оладими?

Шу ерда сиз билан менинг сафдошим бўлган Елена Урлаева ҳаётидан битта лавҳани келтириб ўтай.

“Тошкент вилоятида коллеж ўқувчиларини суратга олган ҳуқуқ ҳимоячиси Елена Урлаевани ўқитувчилар тутиб олиб, милицияга топширди. Пскент тумани ИИБ ходимлари Урлаева олиб улгурган суратларни йўқ қилишга уринди, аммо топа олмади. Натижада, флешкани сочига яширган фаол пахтада юрган ўқувчи ва ишчилар суратини матбуотга етказди” [8]

Таққосланг: техникум маълумотига эга бўлган Елена Урлаева шунча ходимларни доғда қолдириб флешкадек каттагина нарсани тинтувдан соғ-омон олиб чиқа билган.

Шу ерда Гулнора Каримованинг илми ва имкониятлари ҳақида тўхталиб ўтай.

«Гулнора Каримова 1988-йили Тошкентда ёш математиклар академиясини тугатган, 1994-йили – Тошкент давлат университети фалсафа-иқтисодиёт факультетининг халқаро иқтисодиёт бўлимини бакалавр даражаси билан тамомлади. 1992-йили шу билан бирга Ню-Йорк штати университети қошидаги Мода технологиялари институтида таҳсил олди. 1996-йили Каримова Ўзбекистон Республикаси Фанлар академияси қошидаги Иқтисодиёт институтининг магистратурасини битирди, 2000-йили Гарвард университетида санъат магистри даражасига эга бўлди. 2001-йили у Тошкент Жаҳон иқтисодиёти ва дипломатияси университетида сиёсий фанлар доктори бўлди, 2009-йили эса ўша ернинг ўзида профессор илмий даражасини олди. 2006-йили Гулнора Каримова Тошкент ахборот технологиялари университетида телекоммуникациялар соҳасида бакалавр даражасига эришди» [9]

Гулнора Каримова математика, техника ва санъат соҳаларини эгаллай олиб, фан доктори ҳамда профессор бўла туриб наҳотки Елена Урлаевачилик топқир бўлмаса?! Албатта у топқир. Топқирлиги сабабли у уй қамоғида бўлатуриб дунёнинг машҳур газеталарида ўткир танқидий мақолалар ва интервьюлар чоп эттира олди. Агар у 2006-йили Тошкент ахборот технологиялари университетида телекоммуникациялар соҳасида бакалавр даражасига эришганини ҳам эсласак, Гулнора учун бундай вазиятда суратга олишни ташкиллаштириш ва уни хорижга етказиш катта муаммо эмас эканлигини тушунамиз. Агар уни қўриқлаётганлар билими ва тажрибаси инқадар эканлигини инобатга олсак бу янада аён бўлади.


3. УЧИНЧИ ЖАВОБИМ

Энди мухолифатнинг Гулнора Каримовага муносабати масаласига ҳам тўхталиб ўтсам.

Ўзбекистондаги қонли режимнинг бош таянчи ва ўзбек мухолифати, шунингдек ўзбек халқининг асосий душмани Ўзбекистон Миллий хавфсизлик хизматидир. Мен бу ҳақда элликтага яқин мақолаларимда ёзганман. Шулардан биттасини - “МХХ ўзбек халқининг асосий душманидир” номли мақоламни эслатиб ўтай ([10]-га қаранг, ушбу мақоламни www.yangidunyo.com сайти билан бирга йўқ қилишган).

МХХ ўзбек халқи ва мухолифатининг душмани деб тан олсак, МХХнинг икки нафар энг катта раҳбари бўлмиш Ўзбекистон Президенти Ислом Каримов ва МХХ раиси Рустам Иноятов ўз-ўзидан асосий душман рўйхатининг бошида бўлади.

Биз “Душманимнинг душмани менинг дўстимдир” деган доно нақл асосида иш тутишимиз керак эди. МХХ ўзбек халқи ва мухолифатининг душмани бўлар экан, МХХни қаттиқ танқид қилган ва МХХ раиси ҳамда ўринбосари жиноятларини дунё жамоатчилиги олдида мақолалари ва интервьюлари ёрдамида очиб ташлай олган Гулнора Каримова билан муросага боришимиз ҳамда уни ҳимоя қилишимиз ўринлидир. Бу – биринчидан.

Ўзбек мухолифати лидерлари ва фаолларининг асосий хатоси ўзбек халқи ҳамда мухолифатининг асосий душмани МХХ эмас, фақат президент Ислом Каримов деб ҳисоблашларидадир. Мен бундай асосий хато ҳақида катта таҳлилий мақолани рус тилида ёзиб 2011 йил май ойида 4 та сайтда чоп эттиргандим. Бугунги кун - 2014 йил 7 ноябр куни ушбу мақолам фақат www.pravozashitnik.at.ua сайтида сақланган ([11]-га қаранг).

Шундай катта хато туфайли ўзбек мухолифати 26 йилдан бери бирорта каттароқ натижага эриша олган эмас. Гулнора Каримовага қарши ёвдек муомала қилишимиз ушбу катта хатомизни давом эттираётганимиздан далолатдир. Бу – иккинчидан.

Учинчидан, Гулнора Каримова 25 йилдан бери Ўзбекистонга раҳбарлик қилаётган отаси Ислом Каримовнинг тўнғич қизи сифатида МХХ раиси Рустам Иноятов Президентга оғзаки айтган жуда кўп жиноятлар ҳақида билади. Шу сабабли МХХ раҳбарияти Гулнорани бир ёқлик қилиш, менимча қийноқлар ёрдамида уни руҳий касалхонага тиқишга ҳаракат қилиш эҳтимоли катта деб ҳисоблайман.

Тўртинчидан, демократик мамлакатларда катта жиноятларни очишда ҳамкорлик қилган ҳатто ашаддий жиноятчилар жазодан озод этилади, унинг исми шарифи ўзгартирилиб янги ҳужжатлар топширилади ва бошқа жойда яшаши учун уй-жой шароити яратиб берилади.

Бешинчидан, МХХ га таянган Ўзбекистондаги қонли режимга қарши курашда Гулнора Каримова билан ҳамкорлик қилиш унинг билан бирга Фонд форумда ишлаган ва унга хайрихоҳ бўлган юз минглаб Ўзбекистон фуқаролари, улардан аксар кўпчилиги ёшлар мухолифат мақсадлари учун, яъни деморатия йўлида бизлар билан ҳамкорлик қила бошлашади.

Олтинчидан, қолаверса, мен инсон ҳақлари ҳимоячиси ва мустақил журналист сифатида МХХ Гулнора Каримовага нисбатан қўллаётган ноқонуний тазйиқлари ва қийноқларига қаршиман ҳамда уни бу қийноқлардан қутқаришимиз керак, деб ҳисоблайман.


ФОЙДАЛАНИЛГАН АДАБИЁТЛАР

1. 8789 words of wisdom by Barbara Ann Kipfer (Барбара Энн Кипфер. 8789 та ҳикматли гаплар). Workman Publishing, New York, 2001-2010. - 618 p.

2. Малоҳат Эшонқулова: Гулнора Каримовадан интервью олишга рухсат беришингизни талаб қиламан. - http://uzxalqharakati.com/archives/27894 (www.uzxalqharakati.com 2014.04.11)

3. ЭШОНҚУЛОВА М. Мағлуб қилинган Гулнора Каримовадан интервью олиш мумкинми? -
http://www.uznews.net/uz/politics/28140-maglub-qilingan-gulnora-karimovadan-intervu-olish-mumkinmi (www.uznews.net/uz/ 2014.03.11)

4. ЭШОНҚУЛОВА М. Малика ҳақидаги эртак ... - https://www.facebook.com/malohat.esankulova/posts/805207422870672 (www.facebook.com 2014.06.11)

5. ЭШОНҚУЛОВА М. Малика ҳақидаги эртак ... - http://uzxalqharakati.com/archives/27604 (www.uzxalqharakati.com 2014.09.10)

6. http://gkarimova.wordpress.com/2013/03/12/60/#more-60 (www.gkarimova.wordpress.com Персональный блог Гульнара Каримова, 2013.12.03);
Мана буни жасорат деса бўлади! Гулнора Каримованинг Швейцариянинг Bilan журналига берган интервьюсининг батафсил матни. - http://yangidunyo.org/2013/03/12/%d0%bc%d0%b0%d0%bd%d0%b0-%d0%b1%d1%83%d0%bd%d0%b8-%d0%b6%d0%b0%d1%81%d0%be%d1%80%d0%b0%d1%82-%d0%b4%d0%b5%d1%81%d0%b0-%d0%b1%d1%9e%d0%bb%d0%b0%d0%b4%d0%b8/ (www.yangidunyo.org 2013.12.03).

7. Гулнора Каримова МХХ “клани”нинг иқтисодий жиноятларини фош қилди. -
http://www.ozodlik.org/content/article/25211800.html?nocache=1 (www.ozodlik.org 2013.25.12)

8. Елена Урлаева ўқувчи-теримчилар суратини сочига яшириб олиб чиқди. -
http://www.ozodlik.org/content/article/26636950.html (www.ozodlik.org 14.10.2014).

9. Gulnora Karimova. - https://uz.wikipedia.org/wiki/Gulnora_Karimova (www.uz.wikipedia.org/wiki/ Vikipediya, ochiq ensiklopediya)

10. АХМАДЖОНОВ Ш. МХХ ўзбек халқининг асосий душманидир. - http://yangidunyo.com/?p=603#more-603 (www.yangidunyo.com 2012.01.02).

11. АХМАДЖОНОВ Ш. Главная ошибка лидеров узбекской оппозиции (Ўзбек мухолифати лидерларининг асосий хатоси). - http://muvozanat.info/index.php?option=com_content&view=article&id=1999:2011-05-22-19-20-03&catid=31:general&Itemid=18 ( www.muvozanat.info 22.05.2011).
http://pravozashitnik.at.ua/news/2011-05-22-1950 (www.pravozashitnik.at.ua 22.05.2011, страница на русском языке).
http://turonzamin.org/2011/05/24/oshibka/#more-15078 (www.turonzamin.org 24.05.2011).
http://yangidunyo.com/?p=19378 (www.yangidunyo.com 25.05.2011).

E-mail: jiz54@mail.ru ergash1955@yahoo.com

2014 йил 7 ноябр

АҚШ, Вашингтон шаҳри








------------------------------------------------------------

--------------------------------------------------------------------



Gulshan Karaeva Шухрат ака бироз хатога йул куйгансиз.Уй камогида жойлаштирилган хонадонга скрытый камера жойлаштириш эсида йук деб уйлайсизми? Камера оркали хамма нарсани назорат килса булади..

---------------------------------------------

Шуҳратжон Аҳмаджонов

Тўғри, видеокамералар ўрнатилган. Лекин одатда кўпгина фуқаролар мобил телефонини қўлида олиб юради. Фуқаро суратга тушираётганини сездирмаслиги ҳам мумкин. 7 миллион киши яшаётган Вашингтон шаҳрида 100 мингдан ортиқ мобил телефони билан чақимчилик қилиб юрган фуқаро бор. Мен охирги 2,5 йил давомида Вашингтонда яшаб “Вашингтон – чақимчилар шаҳри» деган хулосага келганман. Буни АҚШ махсус хизматлари ташкил этиб фуқаролар ҳақида жуда кўп ахборот тўпламоқда ва ўзлари маъқул кўрган вариантда ишламоқда. Бу ҳақда сал имконият топганимда яхши мақола ёзиш ниятим бор, Аллоҳ хоҳласа.

Гулноранинг қизи Иймон унинг ёнида кетаётган бўлган. Посбонлар Гулнорага қаршилик қилишаётганида Иймон бир неча қадам нарида бўлган. Шу сабабли суратлар аниқ ва тиниқ чиққан. Қолаверса Гулнора компютер соҳасида олийгоҳни тугатган мутахассис. Шу сабабли Гулнорадек фан доктори ва тажрибали мутахассисга фотосуратни компютер ёрдамида камчиликларини тўғрилаш қийин иш эмас.

2014 йил 8 ноябр, соат 23:30

------------------------------------------------------------------



Гайрат Йулдош

Маколани укиб хеч нарсани тушунмадим.
Муаллиф "Гуля"ни химоя килаяптими?
Юкорида у бошчилигидаги бир катор ишлар руйхат билан келтирилган.
Уша ишларни бобоси Карим бободан колган мол-мулкдан килганмикин, ёки халкни хисобиданми?
Кейин "Иноятов ва Шарифхужаевга карши чика олди"-деб ёзилибди.
У нега хокимият кулидалигида уларга карши чикмадию оркасига тепиб хайдалгандан кейин карши чикди? Яна у жудаям аклли ва уша юкоридаги одамлар уни сочини бир толасига тегина олмасликларини бидиб хам карши чикди. Чунки отаси хали тирик. Акс холда....
(Уни аксиясидан бир лавха:. Утган йили Навоий вилоятида "Асрлар садоси" булиб утди. Ва олдинига бюджет ташкилотларга катта катта солик солинди. Кейин хусусий тадбиркорларга навбат келди. Ундан кейин эса....Шу ери огрикли. Хамма бюджет ташкилотларда ишлайдиган ишчи ходимлардан "Асрлар садоси" га уз ихтиёрим билан хисса кушаман"-деб тилхат олиниб уларни бир ойлик маъоши уша тадбир хисоб ракамига ечиб олинди.
Ёки "минг никох туйи ва минг суннат туйи"да хам тадбиркорлардан куп маблаг мажбуран ундирилди.
Кейин ким кахрамон "Гуля".
Кейин ким саховатли "Гуля". Кейин ким зур "Гуля"!!!
Бунака мисоллар жуда куп ва булар тухмат эмас.!!!!!

----------------------------------------------

Ғайратжон, сиз кўп савол ёзибсиз. Айримларига жавоб берай.

1-саволингиз: “Уша ишларни бобоси Карим бободан колган мол-мулкдан килганмикин, ёки халкни хисобиданми?»

Гулнора таржимаи ҳолидан маълумки у 1992 йили АҚШлик бой фуқаро Мансур Мақсудийга турмушга чиққанди. Никоҳдан кейин ўша йили Мансур Мақсудий Тошкентдаги Кока-Кола компаниясининг директори лавозимини эгаллади. 2001 йили никоҳ бузилгач Ўзбекистондаги Кока-Кола компанияси барча бизнес тармоқлари қонунан Гулнорага ўтди.

Бир эслаб кўрингчи: шу ўтган 22 йил давомида шахсан сиз ва яқинларингиз неча шиша кока-кола ичган? Сиз, мен ва 30 миллионли халқимиз ичган ҳар бир шиша кока-коладан катта фойда қолган. Гулнора бойлигининг каттагина қисми кока-коладан келган. Унинг хорижда ҳам бизнеси бор.

2. «У нега хокимият кулидалигида уларга карши чикмадию оркасига тепиб хайдалгандан кейин карши чикди?»

Гулнора ва унинг атрфидаги хайрихоҳлар ташкил этган ҳар бир оммавий тадбирларни МХХ раҳбарлари қўллаб-қувватлаган деб ўйлайсизми? Гулнора жуда кўп қаршиликларни енгиб ўтган. МХХ раҳбарияти Гулнора халқ орасида обрўсизлантириш учун унинг ҳақида кўпгина бумағур миш-мишларни тарқатишни уюштирганди. Масалан, мен шахсан 2007 йилда Тошкентда «Кичик автомобил тўхташ жойларини Гулнора тортиб олаяпти» деган тўҳмат гапларни эшитгандим, менга айтишганди. У икки фарзандни ёлғиз катта қилаётган аёл бўла туриб имконияти даражасида кураш олиб борди.

МХХ туҳмат билан унинг сафдошларини қамаб, қийнаб, қўлларини синдира бошлагач у охирги чора сифатида уй қамоғида бўла туриб МХХ раҳбарлари Иноятов ва Шарифхужаевлар жиноятларини фош этди. Бундай ошкор этгани учун уни ҳатто ўлдириб юборишлари ҳам ҳеч гап эмасди. Ахир уни ва фарзандини симоб билан заҳарлашгани обрўли хориж докторлари ёзиб берган ҳужжатлар билан тасдиқланган.

3. «Ёки "минг никоҳ тўйи ва минг суннат тўйи"да ҳам тадбиркорлардан кўп маблаг мажбуран ундирилди»

Сиз ҳимоя қилмоқчи бўлаётган ўша тадбиркорларингиз ҳар йили қанча пулини пора сифатида ҳокимият ва кучишлатар органларига берганлигини бир ҳисоблаб кўрдингизми? Миллионлаб пора бераётган тадбиркорларингиз бирортаси банкрот бўлган эмас.

Менинг ишончим комилки, йиғилган пулларни Гулнора ўзига ишлатмаган. Пулни рўйхат қилиб йиғишиб ҳақиқатан катта тўйга ишлатилган. Гулнора бу пулларга шахсан қўл урган эмас. Чунки унинг Ўзбекистон бўйича заводларидан етарлича фойда келаётир. Унинг бошқа йўналишлардаги бизнеси ҳам бор эди.

Ўша минг никоҳ тўйи ва минг суннат тўй ҳақиқатан камбағал кишилар учун қилингани ҳамма вилоятдаги ватандошларимиз гувоҳдир. Чунки тўй қилинаётган камбағаллар рўйхати маҳаллаларда тузилган ва бу рўйхатга маҳалла раҳбарлари имзо чекиб муҳр босишган. Тўйда минглаб фуқаролар тўй столи ортида ўтирган камбағал кишилар ва уларнинг суннат бўлаётган фарзандлари эканлигини билишарди.

4. Ғайратжон, эътирозингизни бундай гаплар билан тугатибсиз: «Кейин ким кахрамон "Гуля".
Кейин ким саховатли "Гуля". Кейин ким зур "Гуля"!!!
Бунака мисоллар жуда куп ва булар тухмат эмас.!!!!!»

Ўзбекистондаги порахўр ва қонхўр режим шароитида «Минг никоҳ тўйи ва минг суннат тўйи»га ўхшаш тадбирлар, савоб ишларни ташкиллаштира олгани учун Гулнорага раҳмат дейиш керак. Чунки бу камбағаллар ҳам ҳаётда бир марта яшашади.

Бу менинг фикрларимдир. Менинг фикрларим сизнинг ёки бошқаларнинг фикрлари билан мос тушмаслиги мумкин.

2014 йил 9 ноябр, соат 01:05.

АҚШ, Вашингтон шаҳри

--------------------------------------------------------



Гайрат Йулдош Ака мана узингиз тан олаяпсиз ва ёзаяпсиз "у куп пулни уз бизнесидан топган"-деб.
Хуш унда уша хилма хил килиб утказган тадбирларига УЗ МАБЛАГИДАН эмас балки тадбиркору бюджетникларни маъошларини тортиб олиб сарфлади?

Бировдан угирлаб ёки тортиб олиб иккинчи одамга килинган ёрдам бу савоб ёки яхшилик эмас балки хар кандай одамни наздида карокчилик ва жиноятдир!!!

--------------------------------------

Ғайратжон!

Гулнора бирорта бизнесмендан маблағни тортиб олган эмас. Бу тадбирларда умуман қатнашмаган бизнесменлар ҳам борлигини биласизми? Бирор киши ўша қатнашмаганларни тазйиқ қилдими ёки қамадими?

Пул тўлаганлар ўз хоҳиши билан тўлаётгани ҳақида ҳужжатларга имзо чеккан. Тадбиркорлардан жуда кўпи тўй тадбирларида ўзлари тўйбошида туришган ва кўп ватандошларидан раҳмат сўзларини эшитишган, айримлари эса чой-пой ташиб хизмат қилган.

Бу ўзбекларнинг машҳур ҳашарига ўхшайди: сизнинг гапларингиз “Ҳашарга ўзингиз чиқиб ишланг, бошқаларни тинч қўйинг” дегандек гап. Бир киши ишлаганида бу ҳеч замон ҳашар бўлмайди. Шу сабабли бундай ажойиб тарихий тадбир фақат ўзбекларга хосдир!

Бу тадбирлардан асосий мақсад раҳбарлар, жумладан тадбиркорлар эътиборини шу камбағалларнинг энг катта муаммоларидан бири бўлган тўй тадбирига қаратишдир.

2014 йил 9 ноябр, соат 01:45.

АҚШ, Вашингтон шаҳри

------------------------------------------------



Менгли Каримова ДЕМАК МАКСАД ГУЛНОРА КАРИМОВАНИ ПРЕЗИДЕНТ КИЛИШ.

------------------------------------------------------

Ассалому алайкум Менглихон!

Президентликка номзод Конституция ва қонунларда кўрсатилган жараён асосида кўрсатилади ҳамда рўйхатга олинади. Президентни эса 31 миллионли халқ сайловда сайлайди. Кимдир кимнидир Президент қилиш истаги билан у президент бўлиб кетавермайди. Навбатдаги Президентлик сайлови Ўзбекистонда 2015 йил 15 март куни бўлади.

2014 йил 9 ноябр, соат 02:00.

АҚШ, Вашингтон шаҳри

------------------------------------------------------------

Менгли Каримова Шухратжон буни мен хам биламан , Качон Узбекистон хукумати конунга буйнсунган? сиз нима майнавозмисиз еки узингизни гулликка олаяпсизми?? Халкни лакиллатиш керак эмас.
------------------------------------------------------------

Менглихон!

Биз демократлар ва инсон ҳақлари ҳимоячилари қонунларга таяниб иш кўришимиз керак ва шуни талаб қилмоғимиз керак. Акс ҳолда қонхўр режим жаллодларидан фарқ қилмай қоламиз. Сиз айтган Ўзбекистон ҳукуматини дунёда Диктаторлик режими деб аташади. Президент Ислом Каримовни эса дунёдаги энг хавфли беш диктаторлар рўйхатига киритишганди.

2014 йил 9 ноябр, соат 02:15.

АҚШ, Вашингтон шаҳри

------------------------------------------------------------

Гайрат Йулдош Ака сизни билмадиму ман Узбекистонда ОДАМЛАР ОРАСИДА яшаямман.
У мумкин хеч кимни бурнини конатмагандир. Аммо бу уни айбсиз фаришталигини билдирмайди.
У кимни нимагадир мажбурлаган булса купинча хокимиятлар оркали иш курди. Ва хокимиятдан "фалрн жойга фалон маблагни утказасан" деса бу хамма учун бажариш шарт булган мажбурият буп колди. Ва уша тадбиркорлар Гуля сураётган миллионни деб миллиардларини юкотишни истамай айтганини килишди. Шундай экан кимниям бурни конарди ёрилган бош дуппини тагида булса!
Навоийдаги "Асрлар садоси"да хам хамма ишни узи килмади балки вилоят хокимига буйрук бериб бажартирди!!!
(Кейин ёзаётганларингиз "Ахборот" ва "Давр" курсатувларидаги баланпарвоз гапларга жудаям ухшаб кетаяпти-да!!!
(Эсимда бир тадбиркор акамизга хокимият шунака катта бир маблагни буйнига илди. Кетидан сиз айтгандай тв.да кул ковуштириб режиссер ёзиб берганини тутилиброк айтиб хам берди ва кейин хокимни бутун уруг аймоги билан сукиб юрди оркаваротдан.)

------------------------------------------------------------

Ғайратжон!

1. “Ака сизни билмадиму ман Узбекистонда ОДАМЛАР ОРАСИДА яшаямман.
У мумкин хеч кимни бурнини конатмагандир. Аммо бу уни айбсиз фаришталигини билдирмайди»

Сиз билан мен ҳам фаришта эмасмиз ва билиб-билмай гуноҳларимиз кўп. Айбсиз ёлғиз Аллоҳдир.

2. “У кимни нимагадир мажбурлаган булса купинча хокимиятлар оркали иш курди. Ва хокимиятдан "фалон жойга фалон маблагни утказасан" деса бу хамма учун бажариш шарт булган мажбурият буп колди. Ва уша тадбиркорлар Гуля сураётган миллионни деб миллиардларини юкотишни истамай айтганини килишди.»

Кечирасиз, вилоят ҳокими Гулнорага бўйсунмайди. Ҳоким олдига кириб шахсий илтимос қилингчи, нима дер экан. Бу камбағаллар билан боғлиқ тадбир бўлиб, ҳокимиятдаги алоҳида бўлим ходимлари шуғулланиши вазифасидир. Одатда қонуний қилиб ўша бўлим ходимлари шуғулланишади. Янав бир марта айтаман: кети тоза бўлган ва қўрқмаган тадбиркорлардан айримлари қатнашмаган ҳоллари ҳам бўлди.

Бир телефон қўнғироғи асосида миллионларни олиб борадиган айрим тадбиркорларнинг кети тоза эмас. Шу сабабли улар ким чирманда чалса ўшанинг куйига тушайверишади.

Қайта айтаман: оммавий тўй бу ажойиб ҳамда савобли ишдир. Бунда қатнашганлар савоб олган.

3. Сизнинг гапингиз: “Эсимда бир тадбиркор акамизга хокимият шунака катта бир маблагни буйнига илди. Кетидан сиз айтгандай тв.да кул ковуштириб режиссер ёзиб берганини тутилиброк айтиб хам берди ва кейин хокимни бутун уруг аймоги билан сукиб юрди оркаваротдан.)»

Ғайратжон, сиз мунофиқ одамларни ҳимоя қилаяпсиз. Халқимиз орасида шунақа мунофиқлар борлиги учун бу қонли режим 23 йилдан бери сақланиб келмоқда.

2014 йил 9 ноябр, соат 02:30.

АҚШ, Вашингтон шаҳри

------------------------------------------------------------------



Talib Yakubov Шўҳратбек, земляк! "Пахта қўйиш" ҳам эви билан-да! "У икки фарзандни ёлғиз катта қилаётган аёл бўла туриб..." деган гапингизни билиб ёздингизми ёки кайф аралашми? Жиззахда бизнинг бир қўшнимиз бор. Эрининг ярим умри психбольницада ўтади, икки фарзандини бир ўзи фарроршлик қилиб катта қилаяпти. Шу оиламасми, айтганингиз? Шарҳингиз бошида фақат Кока-кола заводларидан тушаётган фойдани ҳисоб-китоб қилгансиз. Яна ёнига "чет элларда ҳам бизнеси бор" деб қўшиб қўйгансиз. Бу эса "У икки фарзандни ёлғиз катта қилаётган аёл бўла туриб..." деган иддаонгизни бир пулга чиқаради. Авторитар тузумларнинг давлат мулозимлари синфи ичида икки ҚОНУН ҳукм суради: 1) мулозимлар ичида бир-бирини мутлоқ (абсолют) қўллаб-қувватлаш; 2) мулозимлар бир-бирига нисбатан сурункали қарши курашиши. Тамоман бир-бирига қарама-қарши қонунлар-а, сездингизми? Авторитар тузум бошқача бўла олмайди. Пирамида чўққисида авторитар раҳбар ўтирибдими, бирорта мулозим, шу жумладан Р.Иноятов ҳам, авторитар раҳбарни қўятурайлик, унинг невара-чеварасигача тегина олмайди. Авторитар раҳбарга қарши фитна уюштирилиши ҳолидан ташқари.

-------------------------------------------------------------------

Ассалому алайкум ҳамюртим (земляк) Толиб ака!

Мен ёзган "У икки фарзандни ёлғиз катта қилаётган аёл бўла туриб..." деган гапимни фақат моддий томондан тушунган кўринасиз. Гап моддий томонда эмас. Келиб чиқиши ким бўлишидан қатъий назар ҳар бир фарзанд она меҳрига муҳтож бўлишини ҳамма билади. Уларни ўқимишли қилиш эса ҳаммага ҳам насиб этавермайди. Мана ўғли Ислом Лондонда ўқиб, зарур бўлганда онасини ҳимоя қилиб оммавий ахборот воситаларига кучли интервю берди. Бу унинг интеллектуал билими ва қувватини кўрсатди.

Гулнора ҳозир касал қизи Иймон билан бирга. Иймон унинг туфайли давосиз қолаётганини Гулнора она сифатида тушунмайдими ва кечаю кундуз бу муаммони ҳал қилиш устида қайғурмайдими?

Шу ерда раҳматли профессор Ғайбулло Ас-Саломни эслатиб ўтмоқчиман. Унинг ҳалол ва тўғрисўзлиги учун унинг Тошкентда прокуратурада ишлаётган ёлғиз ўғлини ўзбек махсус хизматлари адашмасам 1992 йилда умуман йўқотиб юборишди. Унинг ўлиги қаерда эканлигини шу кунгача хеч ким билмайди. Домулла Ғайбулло Ас-Салом васиятига кўра имом у вафот этганида унинг ва ўғлининг жаноза намозини қўшиб ўқиганди.

Яна бир марта таъкидлайман: мен «У икки фарзандни ёлғиз катта қилаётган аёл бўла туриб имконияти даражасида кураш олиб борди» деган гапни моддий томонни эмас, руҳий ва хавфсизлик тарафини ўйлаб ёздим.

Энг яхши тилаклар билан ҳамюртингиз Шуҳратжон Аҳмаджонов

2014 йил 9 ноябр, соат 03:00.

АҚШ, Вашингтон шаҳри

-------------------------------------------------------------------