Третье Стихословие рачительного к Богу вопияния

1 Почто Тебе, Господа моего, всем сердцем моим не люблю? Почто
все желание мое и хотение мое Тебе не отдам? Почто всею душою моею и всем
помышлением моим во Твою пресвятую любовь не углублен есмь? Ты бо мя всего
сотворил еси и вся туне ми даровал еси. Весь есмь от Тебе, весь есмь Твой,
весь да буду в Тебе! Почто отязуюся и с зельным усердием к Тебе не припаду?
Ты бо от небытия в бытие привел мя еси и непрестанно печешися о душе моей,
о Боже мой! Ты мя питаеши, живиши мя, защищаеши, сохраняеши, покрываеши
душу мою, даруеши ми крепость, здравие, окормляеши, вразумляеши,
просвещаеши, пособствуеши и наставляеши мя на всякая дела благая, вся
благая и спасенная о мне дееши, о, Боже мой!

2 Како убо Тебе аз любити не имам, Господи мой? Како к Тебе не
имам прилеплятися? Ты бо ми еси Бог Един, Источник жизни и податель всех
благ, Творец мой и Господь. Вси удаляющиися от Тебе погибнут, вси не
взыскующии Тебе не спасутся; потребил бо еси всякаго любодеющаго от Тебе.
Вси богатии в плотских страстех, истинно не взыскующии Тебе обнищаша и
взалкаша: взыскующии же Тебе не лишатся всякаго блага. Темже день и нощь к
Тебе да утренюю, день и нощь да Тебе жажду, о Боже мой, и всем сердцем
люблю Тя! Едино просих от Тебе - Господа моего - то взыщу, - еже жити ми в
дому Твоем вся дни живота моего, еже зрети ми красоты Твоя и посещати
церковь Святую Твою. Тебе рече сердце мое: Господа взыщу. Взыска Тебе лице
мое. Лица Твоего, Господи, взыщу.

Книга:Святитель Димитрий Ростовский-Молитвенные
стихословия-Содержание-Первое Стихословие любезного к Богу взывания1-Второе

Найти книгу (клик или правая кнопка мыши и открыть ссылку):
http://www.yandex.ru/yandsearch?text=%D0%A2%D1%8B-...rstr=&zone=all&wordforms=exact