zoloto7 все записи автора 6-я седмица Великого поста (седмица ваий). Глас 5.
Великий пост.

Монастырский устав: cухоядение (хлеб, овощи, фрукты).
Сщмч. Антипы, еп. Пергама Асийского (ок. 68).

Сщмч. Николая пресвитера (1938).

Мчч. Прокесса и Мартиниана (I). Прп. Фармуфия (IV). Прп. Иоанна, ученика прп. Григория Декаполита (IX). Прпп. ИаковаЖелезноборовского (1442) и Иакова Брылевского, сподвижника его (XV). Свт. Варсонофия, еп. Тверского (1576).


Тропарь священномученика Антипы
глас 4
Идольския лести упразднил еси, Антипо,/ и, диавольскую поправ силу,/ пред богоборцы дерзновенно Христа исповедал еси./ Темже со Ангельскими чины в Вышних водворяяся,/ Владыце всех славословие принося,/ и о нас молебное благодарение предлагаеши,/ благодать цельбы даруя./ Сего ради тя чтим,/ священномучениче Антипо,/ моли Христа Бога,// да спасет души наша.
Кондак священномученика Антипы
глас 4
Апостолов сопрестольник и святителей украшение/ был еси, блаженне,/ мученически прославився,/ возсиял еси, якоже солнце, всех просвещая,/ Антипо священне,/ разрушил еси безбожия нощь глубокую./ Сего ради тя почитаем,/ яко Божественнаго суща священомученика// и целеб подателя.
Тропарь святителя Варсонофия, епископа Тверского
глас 3
Возвестителю пути спасительного,/ истинный хранителю апостольских преданий,/ столпе непоколебимый, благочестия учителю/ и Православия наставниче, святителю Варсонофие,/ Владыку всех моли/ мир вселенней даровати/ и душам нашим велию милость.
Ин тропарь святителя Варсонофия, епископа Тверского
глас 4
Тихостию нрава направляемый,/ святителю Варсонофие,/ в тихое пристанище достигл еси,/ смиренномудрия ради удобно избежав сопротивных сетей,/ святою душею твоею на Небеса возлетел еси,/ идеже Христу предстоя,/ моли спастися нам, почитающим память твою.
Ин тропарь святителя Варсонофия, епископа Тверского
глас 8
По Божием законе ревнителю,/ лютый разрушителю неприязненный лести,/ яко миром, потом своим во трудех и бдениих подвизася/ посреде Казанскаго царствия,/ обитель строя боголепнаго Преображения/ и великому своему учителю Гурию последуя,/ с нимже великий союз имея духовный,/ якоже в животе, такоже и по преставлении:/ обретением честных мощей ваших во едино время/ и многими чудесы вас Бог прослави;/ и, радостию восходя в Небесныя обители,/ твердый камене веры,/ от иноплеменник многи скорби претерпел еси,/ добрый вводниче в вечную жизнь,/ в ню же, молим тя, введи ны,/ преподобне отче наш Варсонофие,/ и моли Христа Бога спастися душам нашим.
Кондак святителя Варсонофия
глас 6
Воздержанием тело духу поработив,/ душу же равноангельну сотворил еси,/ сего ради святительства саном почется,/ чисте Чистейшему предстоиши./ Моли Христа Бога, святителю,/ спасти люди твоя, святе,/ да вси вопием ти:/ радуйся, отче преподобне Варсонофие,// граду нашему Казани похвала и утверждение.
Тропарь преподобного Иакова Железноборовского
глас 4
Небеснаго желая,/ земная возненавидел еси/ и, взем крест свой, последовал еси Христу/ и от Него прием дарования чудес,/ исцеляти недужныя;/ но, яко имея дерзновение ко Святей Троице,/ испроси православным Христианом здравие и спасение,/ на враги же победу/ и не забуди, посещая чад своих,/ припадающих к цельбоносному гробу твоему,/ Иакове, преподобне отче наш.
Кондак преподобного Иакова Железноборовского
глас 8
Сердечная очи, досточудне, ко Господу вперив/ и телесныя страсти из корене исторгая,/ неболезненную жизнь в болезнех восприял еси, преподобне,/ болезнем же лютым даеши исцеление просящим с верою у тебе,/ темже молим тя, досточудне,/ исцели наша болезни душевныя и телесныя, да зовем ти:/ радуйся, Иакове Богомудре, отче наш.
Кондак преподобного Иоанна
глас 4
Воздержанием, отче, житие украсив,/ и плоть умертвил еси,/ темже и победил еси вражия прилоги, преблаженне,/ и прешел еси к Богу/ в безскорбный и вечный живот,/ яко достоин наследник, Иоанне,// Емуже молися спастися нам.